10.10.2026 | 12:57
Նավթի գներն աճել են
Իրանի ԱԳՆ-ն չի բացառում ԱՄՆ-ի հետ գերիների փոխանակման շուրջ համաձայնության հասնելը
Քաղաքականություն
24.01.2022 | 17:48
Իրանական կողմը չի բացառում ԱՄՆ-ի հետ գերիների փոխանակման շուրջ համաձայնության հասնելը, սակայն այդ հարցը պետք է քննարկվի միջուկային գործարքից առանձին։ Այս մասին երկուշաբթի կայացած մամուլի ասուլիսում հայտարարել է Իրանի ԱԳՆ պաշտոնական ներկայացուցիչ Սաիդ Խաթիբզադեն, գրում է ՏԱՍՍ-ը։
«Ինչ վերաբերում է ԱՄՆ-ում [բանտերում] գտնվող Իրանի քաղաքացիների վիճակին, ապա մենք առաջին իսկ օրվանից հայտնել ենք մեր մտահոգությունն այս հարցի վերաբերյալ։ Այս թեման մնում է մեր օրակարգում, սակայն, բնականաբար, դրանք տարբեր հարցեր են»,- ասել է նա։
Դիվանագետը հավելել է, որ «եթե հակառակ կողմը ցանկություն ցուցաբերի, ապա երկու հարցերի շուրջ էլ հնարավոր է շուտափույթ համաձայնություն»։
Ավելի վաղ Իրանի հարցով ԱՄՆ Պետքարտուղարության հատուկ ներկայացուցիչ Ռոբերտ Մալլին Reuters-ին տված հարցազրույցում ասել էր, որ Վաշինգտոնը դժվար թե Թեհրանի հետ համաձայնագիր կնքի միջուկային գործարքի շուրջ, եթե իրանական կողմը չազատի ԱՄՆ չորս քաղաքացիներին։ Ըստ ամերիկացիների՝ Իսլամական Հանրապետությունը պատանդ է պահում այդ մարդկանց։
Տաթև Ֆռանգյան
