Կարող են լինել նոր փաստաթղթեր, որոնցից Արմեն Սարգսյանը խուսափեց. Սեյրան Օհանյան․ ՏԵՍԱՆՅՈՒԹ

«Այն գործընթացները, որոնք տեղի են ունեցել վերջին տարիներին, նաև Հանրապետության նախագահի անգործության և նրա լուռ համաձայնության հետևանք են»,- Այս մասին լրագրողների հետ ճեպազրույցում նշեց Ազգային ժողովի «Հայաստան» խմբակցության ղեկավար Սեյրան Օհանյանը՝ անդրադարձավ հանրապետության նախագահի հրաժարականին։

«ՀՀ նախագահի գործունեության կամ ավելի շուտ՝ անգործության վերջին երեք տարիների դիտարկումները թույլ են տալիս եզրակացնել, որ ինքը լիարժեք իր պարտականությունները չի կարողացել կատարել։ Որքան էլ ինքը տեքստի մեջ ակնարկներ կատարի, հղում տա Սահմանադրությանը, իր ու իր ընտանիքի նկատմամբ վերաբերմունքին, ես գտնում եմ, որ այնուամենայնիվ ՀՀ նախագահը Սահմանադրությամբ հանդիսանում է Հանրապետության գլուխը և ինքն ուներ և արարողակարգային, և ուղղակի պարտականություններ՝ Սահամանդրությունը պահելու, նաև ՀՀ անվտանգության ու տարածքային ամբողջակնության երաշխիք հանդիսանալու։ Ինքն իր պարտականությունները չի կատարել:

Ես գտնում եմ, որ ինքն իր գիտելիքներով հնարավորություն ուներ ուսումնասիրել Սահմանադրությունը և իր պարտականությունները կատարել։ Դա նշանակում է, որ կամ նրանք ներկայիս կառավարության հետ ունեցել են պայմանավորվածություններ, կամ կարող է պատահել առերևույթ ճնշումներ են եղել, կամ էլ ինքն իր պարտականությունները պարզապես չի կատարել և թերացել է։ Ինչ վերաբերում է նրա՝ հրաժարական տալուն, և աշխարհաքաղաքական, և ներքաղաքական պայմաններ կարող են լինել։ Կարող են լինել նոր փաստաթղթեր, որից ինքը խուսափում է»,- հայտարարեց Օհանյանը։

«Ես ցավում եմ, որ Արմեն Սարգսյանը հրաժարականը տվել է դրսից, չգիտեմ ինչն է պատճառ եղել, ինքն առողջական որևէ խնդիր չունի։ Կամ եթե ունի, ինքը պետք է բացատրի դրա մասին։ Բայց այսօրվա մեր Սահմանադրությունը հնարավորություն է տալիս, որ պետության գլուխն իր պարտականությունները կատարի։ Եթե ինքն ապացուցելու ինչ-որ բան ունի՝ վերաբերող հայ ժողովրդի ապագային, ընդհակառակը, ինքը պետք է լինի այստեղ, շարունակի իր գործունեությունը և ապացուցի, թե ինքն ինչ նպատակներ ունի»,- հավելեց Օհանյանը։

Նրա խոսքով՝ Արմեն Սարգսյանը կարող էր նախագահական ինստիտուտը զսպող մեխանիզմի վերածել, որը ՀՀ-ում թույլ չէր տա բավական լուրջ թերություններ։ «Նա իր լուռ համաձայնությանբ կամ կառավարության հետ համագործակցությամբ բավական ազդել է ՀՀ կադրային քաղաքականության վրա։ Գոնե ռազմական ոլորտում կադրային նշանակումները կամ կադրերից ազատումները, թույլ են տալիս ասել, որ մակերեսորեն են վերաբերվել այդ հարցին։ Երկրորդ, նրա հրաժարականը թույլ է տալիս ասելու, որ ներքաղաքական և նաև արտաքին լուրջ գործընթացներ կարող են սկսվել, որը հարված է ՀՀ-ին։ Եվ ինքը խուսափում է այդ ամենից։ Եվ երրորդ, նրա հրաժարականից հետո հնարավորություն է ստեղծվում, որպեսզի նախագահական նոր ընտրություններ լինեն։ Եվ այդ ընտրություններում մեր ընդդիմադիր դաշինքն իր խոսքը կասի»,- նշեց նա։

Սեյրան Օհանյանն ասաց, որ քննարկումից հետո կպատասխանեն հարցին՝ թեկնածու առաջադրելու են, թե ոչ։ Ըստ նրա՝ Հանրապետության նախագահ պետք է ընտրվի մարդ, ով մեծ հեղինակություն ունի ոչ միայն Հայաստանում, այլ նաև Սփյուռքում։

Մանրամասները՝ տեսանյութում: