Չինաստանը զգուշացնում է Պեկինի Ձմեռային օլիմպիական խաղերի ժամանակ օդի աղտոտվածության վտանգի մասին

Չինաստանի իշխանությունները միջոցներ կձեռնարկեն աղտոտիչների դեմ՝ հաջորդ ամիս կայանալիք Ձմեռային օլիմպիական խաղերը «լավ միջավայրում» անցկացնելու համար։ Այս մասին այսօր հայտարարել է երկրի Շրջակա միջավայրի նախարարության ներկայացուցիչը, գրում է Today-ը։

Չինաստանի իշխանությունների մոտ նման մտահոգություններ են առաջացել, քանի որ հատկապես ուժեղ մշուշը պատել է երկրի մայրաքաղաք Պեկինը:

Փետրվարի 4-20-ին նախանշված Ձմեռային օլիմպիական խաղերը կանցկացվեն Պեկինում և հարակից Հեբեյ նահանգում, որոնք երկուսն էլ հակված են թանձր մշուշի։ Էկոլոգիայի և շրջակա միջավայրի նախարարության խոսնակ Լյու Յուբինը նախազգուշացրել է, որ ձմեռային եղանակը «շատ անբարենպաստ» է՝ օդը մաքուր պահելու ջանքերի համար։

«Պեկինը և Հեբեյը կարող են ձեռնարկել անհրաժեշտ վարչական միջոցներ Ձմեռային Օլիմպիական խաղերի նախապատրաստման և անցկացման ընթացքում՝ ձեռնարկությունների և բարձր աղտոտվածություն ունեցող տրանսպորտային միջոցների նկատմամբ վերահսկողության միջոցներ ձեռնարկելու համար»,- ասել է Լյու Յուբինը։

Այն բանից հետո, երբ Չինաստանը շահեց Ձմեռային օլիմպիական խաղերի հայտը 2015 թվականին, իշխանությունները փորձել են փակել աղտոտող ընկերությունները և կրճատել ածխի սպառումը՝ խաղերը «կանաչ» դարձնելու համար: Շրջակա միջավայրի նախարարության տվյալների համաձայն, սակայն, երկուշաբթի առավոտյան Պեկինում PM2.5 վտանգավոր օդային մասնիկների կոնցենտրացիան, որը մշուշի հիմնական չափանիշն է, կազմել է 205 միկրոգրամ/խմ, մինչդեռ ԱՀԿ չափանիշների համաձայն՝ դրանց քանակը պետք է լինի 25 միկրոգրամ/խմ:

Տաթև Ֆռանգյան