29.06.2026 | 09:53
ՀՀ տարածքում ավտոճանապարհներն անցանելի են
ԱՄՆ Պետդեպարտամենտը թույլ է տվել իր դիվանագետներին լքել Ուկրաինան
Քաղաքականություն
24.01.2022 | 11:30
Հունվարի 24-ին ԱՄՆ Պետդեպարտամենտը թույլատրել է իր պետական ծառայողներին կամավոր հեռանալ Կիևում գտնվող դեսպանատնից, ինչպես նաև նրանց ընտանիքի անդամներին հրամայել է մեկնել երկրից։ Այս մասին հայտնել են Կիևում ԱՄՆ դեսպանատանից։ Նշվում է, որ մեկնման հրամանի կարգավիճակը կվերանայվի ոչ ուշ, քան 30 օրվա ընթացքում։
Տեղեկացվում է, որ Ուկրաինայում դիվանագիտական առաքելությունը լքելու թույլտվությունն ընդունվել է «որպես հատուկ նախազգուշացում՝ երկիրը ապակայունացնելու և Ուկրաինա այցելող կամ այստեղ բնակվող Ուկրաինայի քաղաքացիների և այլոց անվտանգությունը խաթարելու Ռուսաստանի մշտական ջանքերի պատճառով»։
Դեսպանատանը նշել են, որ այդ քայլի վերաբերյալ խորհրդակցել են Ուկրաինայի կառավարության հետ և իրենց գործողությունները համաձայնեցնում են Կիևում ՆԱՏՕ-ի և գործընկեր երկրների դեսպանատների հետ, իսկ նրանք որոշում են իրենց դիրքորոշումը։
Բացի այդ, Պետդեպարտամենտը թարմացրել է Ուկրաինա մեկնելու համար նախազգուշացման չորրորդ մակարդակը. «Մի՛ ճանապարհորդեք՝ Ուկրաինայի դեմ ռուսական նշանակալի ռազմական գործողությունների սպառնալիքների պատճառով»,- ասված է հաղորդագրությունում:
Տաթև Ֆռանգյան
