Հայաստանի ժուռնալիստների միությունը դատապարտում է իշխանությունների կողմից լրագրողների թիրախավորումը և պահանջում կարգի հրավիրել թիմակիցներին

Ազգային ժողովի հունվարի 20-ի նիստի ընթացքում ելույթ ունենալով՝ «Քաղաքացիական պայմանագիր» խմբակցության պատգամավոր Վահագն Ալեքսանյանը վիրավորական արտահայտություն էր թույլ տվել որոշ լրագրողներին հասցեին։  Այսօր նա իր արտահայտությունները մեկնաբանել է հետևյալ կերպ․

«Երեկ ինչ-որ ասել եմ, պատրաստ եմ դա կրկնել հիմա, վաղը և անվերջ, որովհետև այն բոլոր լրատվականները, որոնք լծված են եղել ՀՀ գլխավոր շտաբի պետին Երևան տանկեր մտցնելու հարցում քաջալերելու գործին, այն բոլոր լրատվականները, որոնք լծված են եղել վարչապետի ընտանիքի, նրա անչափահաս երեխաների կյանքի և անվտանգության սպառնացող հայտարարություններ տարածելու գործին՝նրանց նկատմամբ ատելություն սերմանելով, այդ բոլոր լրատվականները, այո, վերբալ մարմնավաճառներ են Հիմա ասում են, որ լրագրողները նեղացել են։ Հարգելի լրագրողներ, եթե դուք նման բաներով չեք զբաղվել, իսկ ես վստահ եմ, որ շատ կան լրագրողներ, որոնք դրանով չեն զբաղվել, և ես գիտեմ այդ լրագրողներին, բնականաբար, այս խոսքերը ձեզ չի վերաբերվում։ Ակնհայտ է չէ՞։ Իսկ եթե զբաղվել եք, ապա, իհարկե, դա վերաբերվում է ձեզ, կարող եք իմ նկատմամբ ներկայացնել դատական հայց»,- ասել էր Ալեքսանյանը։

Վահագն Ալեքսանյանի հնչեցրած արտահայտությունների վերաբերյալ հայտարարություն է տարածել Հայաստանի ժուռնալիստների միությունը, որը ներկայացնում ենք ստորև։

«Մինչ միջազգային իրավապաշտպան և լրագրողական կազմակերպություններն ամենաբարձր մակարդակով մտահոգություններ են հայտնում Հայաստանում խոսքի ու մամուլի ազատության իրավիճակի խիստ վատթարացման կապակցությամբ, ՀՀ իշխանություններն ամենացածր մակարդակով շարունակում են լրատվամիջոցների և լրագրողների թիրախավորումը։

Իշխանության առանձին ներկայացուցիչներ (հաճախ՝ նաև նախկին լրագրողներ) իրենց անպարկեշտ խոսքով, լրագրողներին պիտակավորելու ցածրարժեք ու գռեհիկ ելույթներով, անցնելով բարեկրթության բոլոր սահմանները, կարծես բացահայտում են իշխանությունների, անձամբ Նիկոլ Փաշինյանի իրական վերաբերմունքը մամուլի և ընդհանրապես ազատ խոսքի նկատմամբ։

Տևական ժամանակ է՝ իշխանություններն ամենատարբեր հարթակներից ու ամենատարբեր ձևաչափերով տոտալ հարձակում են սկսել Զանգվածային լրատվամիջոցների դեմ, և իշխող կուսակցության առանձին ներկայացուցիչների ելույթները սոսկ դրա արտահայտությունն են։

Ազատ խոսքն ու մամուլը, բոլոր թերություններով հանդերձ, մնացել են այն եզակի ինստիտուտները, որոնք փորձում են հակակշռել ու զսպել օրեցօր դեպի բռնապետություն գնացող իշխանությանը։

Իշխանությունների այս հակաժողովրդական և հակաժողովրդավարական գործելաոճին երբեմն նպաստում են նաև  լրագրողական  համայնքում առկա միասնականության և մասնագիտական համերաշխության՝ օբյեկտիվ և սուբյեկտիվ պատճառներով պայմանավորված ցածր մակարդակը, որոշ դեպքերում՝ նաև էթիկայի կանոնները խախտելու որոշ դրսևորումները։

Հայաստանի ժուռնալիստների միությունը խոստորեն դատապարտում է իշխող խմբակցության ներկայացուցիչների կողմից մամուլի դեմ ուղղված հակաէսթետիկ հայտարարությունները՝ իշխանություններից պահանջելով կարգի հրավիրել թիմակից խոսափողներին և կանխել քաղաքակրթության դեգրադացիան երկրում:

Լրատվամիջոցներին ու լրագրողներին կոչ ենք անում չտրվել սադրանքներին, սադրիչ հայտարարություններին և գործողություններին, և նույնիսկ ամենածանր իրավիճակներում հավատարիմ մնալ մասնագիտական բարձր առաքելությանը»։