29.06.2026 | 17:50
Պուտինի հետ հանդիպում պահանջած և ապստամբությամբ սպառնացող զինվորականը կալանավորվել է
Հայ երաժշտական մշակույթը՝ Ճապոնիայում. ճապոնացի երաժիշտները պարգևատրվել են ՀՀ ԿԳՄՍՆ մեդալով և պատվոգրով
Մշակույթ
19.01.2022 | 15:27
Ճապոնացի դաշնակահար Տակահիրո Ակիբան Ճապոնիայում Հայաստանի դեսպանությունում պարգևատրվել է Հայաստանի Հանրապետության կրթության, գիտության, մշակույթի և սպորտի նախարարության մեդալով Ճապոնիայում հայ երաժշտական մշակույթն ակտիվորեն տարածելու գործում նշանակալի ներդրման համար. տեղեկացնում են ՀՀ ԿԳՄՍՆ-ից:
Տակահիրո Ակիբան Ճապոնիայում ՀՀ դեսպանության աջակցությամբ ստեղծված ‹‹Կոմիտասի անվան երաժշտական միության›› («Komitas Society») համահիմնադիրն ու ղեկավարն է և շատ ակտիվ է հայ երաժշտության համերգների կազմակերպման գործում:
Մեդալը երաժիշտին հանձնել է Ճապոնիայում ՀՀ արտակարգ և լիազոր դեսպան Արեգ Հովհաննիսյանը: Հանդիպմանը քննարկվել են առաջիկայում իրագործվելիք ծրագրերը, մասնավորապես՝ Հայաստանի և Ճապոնիայի միջև դիվանագիտական հարաբերությունների հաստատման 30-ամյակի կապակցությամբ նախատեսվող միջոցառումները:
Դուդուկահար Յասուտակա Տարումին ևս ճապոնական հանրության շրջանում հայկական դուդուկի մասին իրազեկվածության բարձրացման գործում նշանակալի ներդրման համար պարգևատրվել է Հայաստանի Հանրապետության կրթության, գիտության, մշակույթի և սպորտի նախարարության պատվոգրով:
Տեղեկացնենք նաև, որ ս.թ. մարտի 13-ին Տոկիոյում կկայանա Ակիբայի և ջութակահար Կեիկո Ուրուշիհարայի համերգը, որի ընթացքում անվանի երգահան Առնո Բաբաջանյանի 100-ամյակի կապակցությամբ երաժիշտները կկատարեն նաև նրա ստեղծագործություններից:
