10.10.2026 | 11:12
Վարորդական վկայական ստանալու «պարզեցված» առաջարկները խարդախություն են․ ՆԳՆ-ն զգուշացնում է
Դատարանը թույլ չտվեց Արմեն Գևորգյանին ներկա գտնվել ԵԽԽՎ նստաշրջանին
Հասարակություն
18.01.2022 | 16:00
Երևան քաղաքի ընդհանուր իրավասության դատարանի Շենգավիթի նստավայրում՝ դատավոր Աննա Դանիբեկյանի նախագահությամբ շարունակում է ՀՀ երրորդ նախագահ Ռոբերտ Քոչարյանի և ՀՀ նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի մասով քրեական գործի քննությունը։
Նիստի սկզբում Գևորգյանը դատարանին է ներկայացրել ԱԺ նախագահի գրությունը, որի համաձայն, ԵԽԽՎ հերթական նստաշրջանին մասնակցելու նպատակով գործուղումը տեղի է ունենալու հունվարի 23-29-ը։ Այս մասին դեռևս դեկտեմբերին էր Գևորգյանի պաշտպան Լուսինե Սահակյանը տեղեկացրել դատարանին, միջնորդելով նշված օրերին դատական նիստեր չնշանակել և սահմանային տեղաշարժի արգելքը վերացնել։
Պաշտպանը նշել էր, որ Գևորգյանը՝ որպես ընդդիմադիր պատգամավոր, պետք է ներկա լինի նիստերին, և հիշեցրել պատգամավորական անձեռնմխելիության մասին, ինչի մասին նաև նշվում է ՍԴ վերջին որոշման մեջ։ Այս միջնորդությունն այսօր կրկին ներկայացվեց դատարան, որը հեռացավ խորհրդակցական սենյակ որոշում կայացնելու։
Քիչ անց վերադառնալով նիստերի դահլիճ՝ դատավոր Դանիբեկյանը հայտնեց, որ որոշում է կայացրել մերժել միջնորդությունը։ Ըստ դատարանի՝ Գևորգյանը կարող է առցանց մասնակցել նստաշրջանի աշխատանքներին, բացի այդ՝ հունվարի 25-ին նախատեսվում է սույն գործով հերթական դատական նիստը, որին, ըստ դատավորի, Գևորգյանի բացակայությունը կհամարվի անհարգելի։ Գևորգյանն էլ իր հերթին արձագանքեց՝ չմեկնելու դեպքում, այնուամենայնիվ, ինքը պետք է առցանց մասնակցի նստաշրջանի աշխատանքներին և կրկին չի կարող ներկա գտնվել դատական նիստին։
Հիշեցնենք՝ Ռոբերտ Քոչարյանը և Արմեն Գևորգյանը մեղադրվում են առանձնապես խոշոր չափերով կաշառք ստանալու մեջ, Արմեն Գևորգյանը՝ նաև հանցավոր ճանապարհով ստացված գույքն օրինականացնելու համար։ Քոչարյանը մեղադրվում է 3 միլիոն դոլար, իսկ Գևորգյանը՝ 1 միլիոն դոլար կաշառք ստանալու համար։
Ռոզա Վարդանյան
