14.07.2026 | 16:38
Քաղցրաշեն գյուղում 13-ամյա աղջիկ է մահացել․ վարչական շրջանի ղեկավարը՝ դեպքի մասին
Իրականում քանի մարդ է մահացել կորոնավիրուսից 2020-ին․ ԱՎԾ-ի և ԱՆ-ի տվյալների համադրման արդյունքը
18.01.2022 | 12:30
2021-ին պարզ դարձավ, որ 2020-ին Ազգային վիճակագրական ծառայության և Առողջապահության նախարարության ներկայացրած կորոնավիրուսից մահվան թվերի տվյալներում էական տարբերություններ կան։ ԱՎԾ-ի տվյալներով՝ 2020 թվականին կորոնավիրուսից մահացել է 3405 մարդ, իսկ ԱՆ Հիվանդությունների վերահսկման և կանխարգելման ազգային կենտրոնի տվյալներով՝ 2828 մարդ։ Այս հարցը Կառավարության նիստերից մեկի ընթացքում բարձրացրել էր Նիկոլ Փաշինյանը՝ Դատախազությանը հանձնարարելով պարզել՝ իրականում այստեղ չարամտություն եղե՞լ է, թե՞ ոչ։
Առողջապահության նախարարությունը այդ հանձնարարականից մեկ ամիս անց տեղեկացնում է, որ արդեն իսկ ուսումնասիրվել են Վիճակագրական կոմիտեի կողմից հրապարակված` կորոնավիրուսային հիվանդության պատճառով մահվան դեպքերի տարբերությունները:
«Վիճակագրական ծառայության կողմից հրապարակված բոլոր դեպքերն անհատապես համադրվել են կորոնավիրուսային հիվանդություն ունեցած անձանց տվյալների հետ, և առողջապահության նախարարության կողմից շտկվել է ԱՆ էլեկտրոնային տեղեկատվական բազայի մահվան տվյալները` դրանք համապատասխանեցնելով Վիճակագրական կոմիտեի հրապարակած վիճակագրությանը»,- նշված է ԱՆ պարզաբանման մեջ։
Առողջապահության նախարարությունը հաղորդագրության մեջ, սակայն, չի նշել, թե տվյալների համապատասխանեցման արդյունքում ինչ պատկեր է արձանագրվել։ Factor.am-ը գերատեսչության խոսնակ Հռիփսիմե Խաչատրյանից հետաքրքրվեց՝ իրականում տվյալների անհամապատասխանությունը Առողջապահության նախարարությա՞ն, թե՞ Վիճակագրական կոմիտեի թերացումն է։
«Նախարարը բազմիցս ասել է, որ տվյալների թվայնացման գործընթացից ելնելով՝ միանգամից հնարավոր չէր մուտքեր ապահովել, դրա համար ժամանակ էր հարկավոր, հիմա արդեն բոլոր տվյալները մուտքագրված են ու համապատասխանում են։ Բազայում մուտքագրման համար ժամանակ էր հարկավոր ու աստիճանաբար արվեց»,- պարզաբանեց խոսնակը։
Վիճակագրական կոմիտեի հրապարակած նոր տվյալներից տեղեկանում ենք, որ 2020 թվականին կորոնավիրուսից մահացել է 2 609 մարդ, իսկ 2021-ին՝ 5 079, այդ թվում՝ 70 դեպք, որ գրանցվել է ՀՀ-ից դուրս, սակայն քաղաքացիական կացության գրանցումները կատարվել են ՀՀ ՔԿԱԳ-ում:
Արփի Հակոբյան
