Արաբական կոալիցիան ավիահարվածներ է սկսել Սանայում՝ Աբու Դաբիի վրա հութիների հարվածներին ի պատասխան

Աբու Դաբիում անօդաչու թռչող սարքերի միջոցով հարձակումից հետո, որը մի քանի մարդու կյանք է խլել, Արաբական երկրների կոալիցիան Սաուդյան Արաբիայի գլխավորությամբ հայտարարել է ապստամբների կողմից վերահսկվող Եմենի մայրաքաղաք Սանայի ուղղությամբ ավիահարվածներ սկսելու մասին: Սաուդյան Արաբիայի պաշտոնական լրատվական գործակալությունը հայտնել է, որ հարձակումները Սանայում իրականացվում են՝ «ի պատասխան սպառնալիքի և ռազմական անհրաժեշտությունից ելնելով», գրում է DW-ի ռուսական ծառայությունը։

Կոալիցիայի խոսնակ, բրիգադային գեներալ Թուրկի Ալ-Մալիքին հութիների հարվածները բնութագրել է որպես «թշնամական ահաբեկչական հարձակումներ»՝ ընդգծելով, որ «մեղավորները պետք է պատասխանատվության ենթարկվեն», քանի որ դրանք «վտանգ են ներկայացնում տարածաշրջանային և միջազգային անվտանգությանը»։

Հութիներին պատկանող «Ալ Մասիրա» հեռուստաալիքը հաստատել է կոալիցիայի հարձակումների փաստը։

Ավելի վաղ եմենցի ապստամբները հայտարարել էին Արաբական Միացյալ Էմիրությունների (ԱՄԷ) տարածքում իրականացված «ռազմական գործողության» մասին։ Տեղի ոստիկանության տվյալներով՝ հարձակման թիրախ են դարձել վառելիքի երեք բեռնատարներ՝ դրանք պայթել են և բռնկվել։ Բացի այդ, Աբու Դաբիի օդանավակայանի մոտակայքում գտնվող շինհրապարակում փոքր հրդեհ է բռնկվել, որը մարվել է։ Հարձակման հետևանքով երեք մարդ է զոհվել՝ Պակիստանի մեկ և Հնդկաստանի երկու քաղաքացի, ևս վեց մարդ վիրավորվել է։

Տաթև Ֆռանգյան