Պորոշենկոն Վարշավայից ժամանել է Ուկրաինա․ նրան դիմավորել են իրավապահները. ԼՈՒՍԱՆԿԱՐՆԵՐ, ՏԵՍԱՆՅՈՒԹ

Ուկրաինայի հինգերորդ նախագահ, ժողովրդական պատգամավոր, «Եվրոպական համերաշխություն» կուսակցության առաջնորդ Պետր Պորոշենկոն այսօր Լեհաստանից վերադարձել է Ուկրաինա։ Վարշավայից ժամանած ինքնաթիռը վայրէջք է կատարել մայրաքաղաքի Ժուլյանի օդանավակայանում։ Ժամը 11։00-ին Պորոշենկոյին սպասում են Պեչերսկի դատարանում, այսպես կոչված, «ածխի» գործով խափանման միջոց ընտրելու համար, գրում է ՈւՆԻԱՆ-ը։

Ուկրաինայի նախկին նախագահին Կիև ժամանելուն պես դիմավորել են Հետաքննությունների պետական բյուրոյի (ՀՊԲ) աշխատակիցները։ Նրան արգելել են անձնագրային հսկողություն անցնել, վերցրել են անձը հաստատող փաստաթուղթը, որն ավելի ուշ վերադարձրել են։

Պորոշենկոյին ծանուցագիր է հանձնվել։ Գերագույն ռադայի պատգամավոր Ալեքսեյ Գոնչարենկոն հայտնել է, որ իրենք գնում են Պեչերսկի դատարան։ Ավելի ուշ Պորոշենկոն գնացել է օդանավակայանի սպասասրահ և հանդես եկել ելույթով։

«Իրավապահ մարմինների աշխատակիցները, որոնցից մի քանիսը սահմանապահների համազգեստով էին, պարզապես փորձեցին ինձ թույլ չտալ մուտք գործել Ուկրաինա»,- ասել է Պորոշենկոն։

Պորոշենկոն Ուկրաինայի մայրաքաղաք է ժամանել Վարշավայից. նրա հետ երկիր են եկել կինը՝ Մարինան, փաստաբանները, մի քանի պատգամավորներ։ Միաժամանակ, օդանավակայանի շենքի մոտ ի պաշտպանություն քաղաքական գործչի բողոքի ցույց է կազմակերպվել։

Նշենք, որ քննիչները կարծում են, որ Ուկրաինայի հինգերորդ նախագահը մասնակցել է «Ընդդիմադիր պլատֆորմ հանուն կյանքի» կուսակցության քաղխորհրդի ղեկավար և ՌԴ նախագահի կնքահայր Վիկտոր Մեդվեդչուկի սխեմային։ Ըստ այդ մեղադրանքների՝ Պորոշենկոն, իբր, օգնել է խափանել Հարավային Աֆրիկայից ածխի մատակարարումը, որպեսզի Ուկրաինային մատակարարվի Դոնբասում արդյունահանված ածուխը։

Պորոշենկոն մեղադրանքը չի ընդունում։ Դեկտեմբերի կեսերին նա մեկնել էր արտասահման՝ հայտարարելով, որ հունվարի 17-ին կվերադառնա ու դատարան կներկայանա։

Տաթև Ֆռանգյան