Ազգային ավիափոխադրողը գարնան վերջից կսկսի կանոնավոր թռիչքները

Այս տարվա մայիսի վերջից ազգային ավիափոխադրողը՝ «Ֆլայ Արնան», նախատեսում է սկսել կանոնավոր թռիչքները։ Այս մասին այսօր հայտարարեց «Էյր Արաբիա» խմբի գործադիր տնօրեն Ադել Ալին: 

Թռիչքները կսկսեն 2 ինքնաթիռով, կարճ ժամանակ անց կմիանա 3-րդը, որից հետո ինքնաթիռների քանակը կավելացվի։  

«Արդեն իսկ նախապատրաստական մեծ աշխատանքներ են արվել։ Աշխատել է շուկայական փորձագետների, բրենդավորման մասնագետների մի ամբողջ թիմ։ «Ֆլայ Արնան» ցանկանում է դառնալ առաջին ընտրության ավիաուղին թե՛ հայերի, թե՛ օտարերկրացիների համար։ Կապահովվի վստահելի, մատչելի և անվտանգ օդային ճամփորդություն։ Այսօր մեծ կարևորություն ենք տալիս նաև բյուջետային ճամփորդությանը։ Ինչ վերաբերում է գնային քաղաքականությանը, ապա գինը միշտ պետք է լինի մրցակցային՝ պահպանելով բիզնես մոդելը։ Մեր առավելությունը մեր կոմերցիոն փորձն է, իսկ այնտեղ, որտեղ ստեղծվում են լավ ավիաուղիներ, տնտեսությանը նպաստելու կարևոր գործոններ են ձևավորվում։ Վստահ եմ, որ կունենանք հաջողված ավիափոխադրող։ Ժամանակակից հայկական ավիափոխադրողը կտրամադրի բոլոր անհրաժեշտ ծառայությունները»,- ասաց Ադել Ալին։ 

Թռիչքների որոշ ուղղություններ արդեն նախանշված են՝ Կենտրոնական Ասիա, Ռուսաստանի Դաշնություն, Միջին Արևելք։ Ինչ վերաբերում է եվրոպական երկրներ իրականացվող թռիչքներին, ապա Ադել Ալիի խոսքով՝ դա ևս իրենց բիզնես պլանի մի մասն է և հընթացս թռիչքներ կնախատեսվեն նաև այդ ուղղություններով։ Ազգային ավիափոխադրողը Եվրոպայում համագործակցելու է 40 օդանավակայանի հետ։

«Երբ գա համագործակցելու պահը՝ կգտնենք դա անելու ճանապարհը, եթե դեռևս լուծված չլինի ԵՄ-ի «սև ցուցակում» հայտնվելու խնդիրը»,- ընդգծեց Ադել Ալին։

Հայաստանի պետական հետաքրքրությունների ֆոնդի գործադիր տնօրեն Դավիթ Փափազյանն էլ իր խոսքում նշեց, որ նպատակն, ի սկզբանե, եղել է իրապես մրցունակ տնտեսական միավորի ստեղծումը, որի շնորհիվ Հայաստանը միջազգային զբոսաշրջային քարտեզի վրա ավելի գրավիչ ուղղություն կդարձնի։

«Համագործակցությունը իրականացվում է օտարերկրյա ընկերության հետ, որովհետև «Էյր Արաբիան» ունի կենսունակ մոդելի հաջողված փորձ։ «Ֆլայ Արնան» արտահայտում է Հայաստանի էությունը և առաջացնում է այն էմոցիաները, որ պետք է առաջացնի ազգային ընկերությունը»,- ընդգծեց Փափազյանը։

Ընկերության խորհրդանիշում օգտագործվել են Հայաստանի դրոշի գույները և ճամփորդող մարդու մոդելը։   Ավիափոխադրողը սկզբում մի քանի հարյուր աշխատատեղ կապահովի, իսկ հետագայում ցանկացած նոր ուղղության և  ինքնաթիռի ավելացմանը զուգահեռ աշխատակիցների թիվը մոտ 100-ով կավելանա։

Հիշեցնենք, որ ԱՆԻՖ-ի և Մերձավոր Արևելքի ու Հյուսիսային Աֆրիկայի առաջին և ամենամեծ բյուջետային ավիափոխադրող «Էյր Արաբիա»-յի միջև 2021 թվականի  հուլիսին ստորագրվել էր  հայկական նոր ազգային ավիաընկերության ստեղծման վերաբերյալ համաձայնագիր: Ստեղծված համատեղ ձեռնարկությունը կգործի որպես բյուջետային ուղևորափոխադրող ավիաընկերություն, որի բազան կհանդիսանա Երևանի «Զվարթնոց» միջազգային օդանավակայանը։

Սաթենիկ Հայրապետյան