Ալիևը կրկին տարածքային պահանջներ է ներկայացրել ՀՀ-ին

Հարավային Կովկասում խաղաղության հաստատման համար Հայաստանը պետք է ճանաչի Ադրբեջանի տարածքային ամբողջականությունը։ Այս մասին հայտարարել է Ադրբեջանի նախագահ Իլհամ Ալիևը ադրբեջանական հեռուստաընկերություններին տված հարցազրույցում։

«Մենք երրորդ պատերազմ չենք ուզում, դա մեր պլաններում չկա։ Մենք ցանկանում ենք, որ ռազմական փուլն ավարտվի, մենք ցանկանում ենք նորմալ հարաբերություններ հաստատել, ցանկանում ենք, որ Հայաստանը վերջապես ճանաչի Ադրբեջանի տարածքային ամբողջականությունը։ Մենք դա ենք ուզում։ Սակայն եթե տեսնենք, որ մեզ համար վտանգ կա, այն տեղում կոչնչացվի»,- հայտարարել է Ալիևը՝ Հայաստանի հասցեին կրկին սպառնալիքներ հնչեցնելով։

«Հայաստանը հիմա պետք է ընտրություն կատարի՝ ճիշտ ընտրություն։ Ես ասել եմ, որ մեր առաջարկը միշտ սեղանին է լինելու։ Եթե Հայաստանը չի ցանկանում ճանաչել Ադրբեջանի տարածքային ամբողջականությունը, ապա մենք էլ չենք ճանաչի նրա տարածքային ամբողջականությունը»,- ասել է Ադրբեջանի նախագահը։
Բացի այդ, Ալիևը կրկին տարածքային պահանջներ է ներկայացրել Հայաստանին ու զբաղվել պատմական կեղծարարությամբ՝ նշելով, որ ՀՀ տարածքները պատկանում են Ադրբեջանին։

«1920 թվականի նոյեմբերին «մեր տարածքը»՝ Զանգեզուրը, միացվել է Հայաստանին, ավելի վաղ՝ 1918 թվականի մայիսի 29-ին, Երևանը «տրվել է» Հայաստանին։ Ուստի, մենք բազմաթիվ պատճառներ ունենք չճանաչելու Հայաստանի տարածքային ամբողջականությունը։ Չնայած դրան, հանուն ապագա խաղաղության մենք պատրաստ ենք դրան»,- ասել է Իլհամ Ալիևը։

Նա հավելել է, թե Հայաստանին առաջարկել են փոխադարձ ճանաչել տարածքային ամբողջականությունը, սկսել սահմանի դելիմիտացիայի աշխատանքը, հաղորդակցությունների բացման գործընթացը ու խաղաղության պայմանագիր ստորագրել։

«Խաղաղության պայմանագրի ստորագրումը 100 տոկոսանոց երաշխիք չէ, սակայն, ամեն դեպքում, այն զգալիորեն կնվազեցնի պատերազմի վտանգը»,- ասել է Ադրբեջանի նախագահը՝ հավելելով, որ, անկախ ամենից, Բաքուն շարունակելու է հզորացնել ռազմական ներուժը։

Էմմա Չոբանյան