19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Գյումրու քաղաքապետարանում բաժնի պետեր են ազատվել
Քաղաքականություն
12.01.2022 | 13:41
Գյումրու քաղաքապետարանում աշխատանքից ազատվել են մի քանի բաժնի պետեր, որոնք պաշտոնավարում էին դեռևս Սամվել Բալասանյանի՝ քաղաքապետության օրոք։ Պաշտոնից մասնավորապես ազատվել է բնակկոմունալ և շրջակա միջավայրի պահպանության բաժնի պետ Կնյազ Մանասյանը, բյուջեի եկամուտների հավաքագրման բաժնի պետ Սուրեն Ջանոյանը և տրանսպորտի բաժնի պետ Արտյոմ Սարգսյանը։
Արտյոմ Սարգսյանը մեզ հետ զրույցում ասաց, որ աշխատանքից դուրս է եկել դեռ դեկտեմբերի 8-ից՝ նոր աշխատանքի անցելու նպատակով։ Նա չմանրամասնեց, թե ինչ աշխատանքի է անցնում, ասաց՝ նոր աշխատանքը քաղաքապետարանում չէ։
Գյումրու համայնքապետարանի աշխատակազմի գլխավոր քարտուղար Կարեն Բադալյանն էլ պարզաբանեց, որ Կնյազ Մանասյանն ազատվել է օրենքի ուժով, նա թոշակառու է, լրացել է 66 տարին, թոշակի անցնելուց հետո մի տարով երկարացրել էին նրա պայմանագիրը, հիմա չեն կարող, օրենքը թույլ չի տալիս։
Բյուջեի եկամուտների հավաքագրման բաժնի պետ Սուրեն Ջանոյանն էլ, ըստ Կարեն Բադալյանի, ազատվել է ինքնակամ՝ սեփական դիմումի համաձայն։
Ի դեպ, մեզ տեղեկություններ են հասել, որ նա շուտով կնշանակվի բնակկոմունալ և շրջակա միջավայրի պահպանության բաժնի պետ, այսինքն՝ կփոխարինի Կնյազ Մանասյանին, իսկ նրա պաշտոնը, որը դեռ թափուր է, կտրվի ՔՊ-ին։
Այս պահին թափուր է նաև քաղաքաշինության և ճարտարապետության բաժնի պետի պաշտոնը։ Հիշեցնենք, որ ԱԱԾ-ն Գյումրու քաղաքապետի ընտրության նախաշեմին ձերբակալել, այնուհետ կալանավորել էր այդ բաժնի պետ Արթուր Հակոբյանին և ապօրինի շինարարության բաժնի պետի տեղակալ Հովհաննես Գևորգյանին՝ գյումրեցի մի կնոջից 2000 դոլար կաշառք պահանջելու ու կաշառք վերցնելու քրգործի շրջանակում։ Երկուսն էլ օրերս ազատ են արձակվել։
Արմիկ Մովսիսյան
