Բայդենի ու Էրդողանի խորհրդականները քննարկել են հայ-թուրքական հարաբերությունների կարգավորման գործընթացը

ԱՄՆ նախագահի ազգային անվտանգության հարցերով խորհրդական Ջեյք Սալիվանը նախօրեին հեռախոսազրույց է ունեցել Թուրքիայի նախագահի գլխավոր խորհրդական, մամուլի խոսնակ Իբրահիմ Քալընի հետ, տեղեկանում ենք Սպիտակ տան պաշտոնական կայքից։

«Նրանք քննարկել են դաշնակիցների և գործընկերների հետ համաձայնեցված շարունակական ջանքերը՝ Ուկրաինայի նկատմամբ Ռուսաստանի հետագա ագրեսիայից խուսափելու և դիվանագիտական ճանապարհով լարվածությունը թուլացնելու համար։ Նրանք կարծիքներ են փոխանակել տարածաշրջանային հարցերի շուրջ, այդ թվում ՝ Ղազախստանում տիրող իրավիճակի։ Կողմերը համաձայնել են Բոսնիա և Հերցեգովինայում կայունության և միասնության պահպանման և Կովկասում լարվածության դեէսկալացիայի և նորմալացման ուղղությամբ աշխատելու կարևորության շուրջ»,-ասվում հաղորդագրության մեջ։

Թուրքական կողմի հաղորդագրության մեջ, որը ներկայացնում է Անադոլու գործակալությունը նշվում է, որ կողմերը քննարկել են նաև հայ-թուրքական հարաբերությունների կարգավորման հարցերը։

«Անդրադարձ է կատարվել Թուրքիայի և Հայաստանի միջև հարաբերությունների կարգավորման գործընթացին, ինչպես նաև Աֆղանստանում, Բոսնիա և Հերցեգովինայում, Եթովպիայում տեղի ունեցած վերջին իրադարձություններին։ Ընդգծվել է, որ Ադրբեջանի ու Հայաստանի միջև մշտական խաղաղության հաստատումը կնպաստի տարածաշրջանային կայունությանն ու բարգավաճմանը»,-ասվում է հայտարարության մեջ։ Քալընը նաև նշել է, որ Թուրքիան մտադիր է հետագայում ևս իր ներդրումն ունենալ Բալկաններում, Հարավային Կովկասում, Մերձավոր Արևելքում, Կենտրոնական Ասիայում ու Աֆրիկայում խաղաղության ու կայունության ապահովման գործում։

Էմմա Չոբանյան