Ամերիկացի փորձագետները Բայդենի ազգային անվտանգության հարցերով խորհրդականին հորդորել են ավելացնել Ուկրաինա զենքի մատակարարումները

Ռուսաստանի հարցերով մի խումբ փորձագետներ Ժնևում կայանալիք բանակցություններին ընդառաջ ԱՄՆ նախագահ Ջո Բայդենի ազգային անվտանգության հարցերով խորհրդական Ջեյք Սալիվանին կոչ են արել ուկրաինացիներին ավելի շատ զենք ուղարկել․ գրում է Axios-ը։

«Ռուս պաշտոնյաների հետ դիվանագիտական հանդիպումից առաջ Ռուսաստանի հարցերով փորձագետների խումբը հորդորել է ազգային անվտանգության հարցերով խորհրդական Ջեյք Սալլիվանին ավելի շատ զենք ուղարկել ուկրաինացիներին»,- գրում է լրատվամիջոցը։

Axios-ի տվյալներով՝ Սալիվանի տեսակոնֆերանսը Ռուսաստանի հետ կոշտ գծի քաղաքականության կողմնակիցների, այդ թվում՝ նախկին նախագահ Դոնալդ Թրամփի օրոք պաշտոն զբաղեցրածների հետ, տեղի է ունեցել նախորդ երկուշաբթի։

Ինչպես գրում է լրատվամիջոցը, Բայդենի վարչակազմի մի շարք բարձրաստիճան պաշտոնյաներ հայտարարում են, որ կա մի քանի ոլորտ, որոնք Ռուսաստանի մտահոգությունն են առաջացնում և որոնք ԱՄՆ-ն ցանկանում է քննարկել փոխադարձության սկզբունքով։ Դրանց թվում են սպառազինությունների նոր սահմանափակումները, ինչպես նաև Եվրոպայում անցկացվող զորավարժությունների քանակն ու ընդգրկումը։

Լրատվամիջոցի աղբյուրները հերքել են տեղեկություններն այն մասին, որ ԱՄՆ-ն դիտարկում է Եվրոպայում զորքի թվաքանակի կրճատման հարցը։ Նրանք նաև ընդգծել են, որ առաջիկա բանակցություններում «որևէ հստակ պայմանավորվածություն չի լինելու»։

Իր հերթին Սալիվանը լրատվամիջոցին հայտնել է, որ ԱՄՆ-ն մտադիր չէ քննարկել Ռուսաստանի հետ եվրոպացի դաշնակիցների հետ հարաբերությունները առանց նրանց անմիջական մասնակցության։

Էմմա Չոբանյան