15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
ՀԱՊԿ-ը Ղազախստանում իր գործողությունների մասին ծանուցել է ՄԱԿ-ի Անվտանգության խորհրդին
Քաղաքականություն
07.01.2022 | 14:11
ՀԱՊԿ գլխավոր քարտուղար Ստանիսլավ Զասի նամակն ուղարկվել է ՄԱԿ-ի Անվտանգության խորհրդի անդամներին, որում նա տեղեկացնում է Ղազախստանի տարածքում խաղաղապահ գործողության անցկացման մասին, գրում է BBC-ի ռուսական ծառայությունը։
«Հաշվի առնելով Ղազախստանի Հանրապետության ազգային անվտանգությանը և ինքնիշխանությանը սպառնացող վտանգը և ղեկավարվելով Հավաքական անվտանգության պայմանագրի 2-րդ և 4-րդ հոդվածներով՝ ՀԱՊԿ Հավաքական անվտանգության խորհուրդը որոշում է կայացրել Ղազախստանի Հանրապետության տարածքում խաղաղապահ գործողություն իրականացնել ՀԱՊԿ զորքերի ուժերով և միջոցներով»,- ասված է նամակում։
Ավելի վաղ Ղազախստանի նախագահի աշխատակազմի ղեկավարի առաջին տեղակալ Դաուրեն Աբաևը հայտարարել էր, որ Հավաքական անվտանգության պայմանագրի կազմակերպության խաղաղապահ կոնտինգենտը չի մասնակցում մարտական գործողությունների: ՀԱՊԿ խաղաղապահները պատասխանատու են պետական օբյեկտների պահպանության համար:
Հիշեցնենք, որ ՀՀ վարչապետ Նիկոլ Փաշինյանն ավելի վաղ հայտնել էր, որ Ղազախստանի Հանրապետության նախագահ Կասիմ-Ժոմարտ Տոկաևի դիմումի հիման վրա և Ղազախստանի ազգային անվտանգությանն ու ինքնիշխանությանը սպառնացող վտանգների բերումով, որն առաջացել է այդ թվում՝ արտաքին միջամտության հետևանքով, ՀԱՊԿ Հավաքական անվտանգության խորհուրդը Հավաքական անվտանգության պայմանագրի 4-րդ հոդվածի համաձայն՝ որոշում է կայացրել սահմանափակ ժամանակահատվածով Ղազախստանի Հանրապետություն ուղարկել ՀԱՊԿ հավաքական խաղաղապահ ուժեր՝ այդ երկրում իրավիճակի կայունացման և կարգավորման նպատակով:
Տաթև Ֆռանգյան
