Գյումրու Անի թաղամասի բազմաբնակարան շենքերը կջերմամեկուսացվեն

Գյումրու ամենամեծ բնակելի թաղամասի՝ Անիի բազմաբնակարան շենքերը, որոնք մեծամասամբ բետոնյա են, կառուցվել են երկրաշարժից հետո՝ ռուսական տարբեր շինարարարական կազմակեպությունների կողմից, մտադիր են ջերմամեկուսացնել։

Այս մասին Factor.am-ի հետ զրույցում տեղեկացրեց Գյումրու քաղաքապետ Վարդգես Սամսոնյանը։ Ըստ նրա՝ այս թաղամասի քարուքանդ, ցեխաշախաղ փողոցների ասֆալտապատման հարցը լուծելուն պես՝ կմտածեն նաև ցուրտ բնակարանները տաքացնելու մասին։

«Անի թաղամասը բարեկարգելուց հետո մտածում ենք նաև ջերմամեկուսացման ծրագրի իրագործման մասին, որը ոչ միայն ցուրտ շենքերը կտաքացնի, այլև բնակչի ջեռուցման ծախսերը կնազեցնի, 30-40 տոկոս կտնտեսի։

Ես 10 տարի ապրել եմ Անի թաղամասում․ պատերը սառն են, ջերմամեկուսացման դեպքում տունը կտաքանա, շենքի արտաքին հատվածում պենոպլեքս կամրացվի, սա ջերմահաղորդության կայուն գործակից ունի, թերմոս է սարքում, տաքություն ապահովում։

Ընդունենք՝ մարդը ջեռուցմանը տալիս է 40 հազար դրամ, այս դեպքում 30 տոկոսով պակաս կտա, 28 հազար դրամով կպրծնի, և եթե ի նկատի ունենանք, որ Գյումրիում 5 ամիս տները ջեռուցում են, ամեն սեզոնի մոտ 100 հազար դրամ կտնտեսի»,- հաշվարկեց քաղաքապետը։

Նշենք, որ արտաքին ջերմամեկուսացման առաջին փորձը Գյումրիում կատարվել է հենց Անի թաղամասում՝ դեռ 2015 թվականին։ Այդ ժամանակ ջերմամեկուսացվեց այս թաղամասի «Հուսո Առագաստ» մանկապարտեզը՝ խնայելով ջեռուցման ծախսերը։ Ծրագիրն իրագործվել էր Գյումրու քաղաքապետարանի և ԱՄՆ միջազգային զարգացման գործակալության «Մաքուր էներգիա և ջուր» համատեղ աշխատանքի արդյունքում:

Արմիկ Մովսիսյան