16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Սարչապետի բնակիչն իր տունը, գոմը և մառանը նվիրում է ՊԵԿ-ին
Հասարակություն
04.01.2022 | 23:53
Հայաստանի քաղաքացի Էդգար Անտոնյանը 2021 թվականի նոյեմբերի 17-ին դիմել է Պետական եկամուտների կոմիտե և ցանկություն հայտնել Լոռու մարզի Սարչապետ համայնքի Ձորամուտ գյուղի իրեն պատկանող գույքը նվիրատվություն կատարել ՊԵԿ-ին:
Նվիրատվությունը ներառում է 84.8 քմ բնակելի տունը, 9.1 քմ մառանը, 20.7 քմ անասնաշենքը, 8.8 քմ տնտեսական սենյակը, 19.4 քմ ավտոտնակը և 0.333 հա հողամասը:
Քաղաքացին նշել է, որ նշված գույքը չի օգտագործվում իր կողմից և տեղադիրքով ընկած է Հայաստանի Հանրապետության պետական եկամուտների կոմիտեին ամրացված սահմանամերձ հողամասերի միջանկյալ հատվածում:
Նախագծի հիմնավորման մեջ նշվում է՝ տարածքը ՊԵԿ-ին ամրացնելու անհրաժեշտությունը պայմանավորված է նրանով, որ տվյալ և հարակից հողամասերը, որոնք արդեն իսկ ամրացված են պետական եկամուտների կոմիտեին, կկազմեն մեկ ամբողջություն և ավելի արդյունավետ կդառնա սահմանային հսկողության իրականացումը:
Նշված գույքը սահմանամերձ է և եզրային հատվածով հարակից է պետական եկամուտների կոմիտեի Արևելյան մաքսատուն-վարչության Գոգավանի մաքսային կետ-բաժնին:
Նարեկ Կիրակոսյան
