16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Միջուկային տերությունները փորձում են բացառել միջուկային պատերազմները
Քաղաքականություն
04.01.2022 | 18:17
Միջուկային զենք ունեցող հինգ երկրները համատեղ հայտարարություն են տարածել միջուկային պատերազմը կանխելու անհրաժեշտության և միջուկային սպառազինությունների մրցավազքի անթույլատրելիության մասին։ Այս մասին գրում է Ամերիկայի ձայնը:
«Չինաստանի Ժողովրդական Հանրապետությունը, Ռուսաստանի Դաշնությունը, Մեծ Բրիտանիայի և Հյուսիսային Իռլանդիայի Միացյալ Թագավորությունը, Ամերիկայի Միացյալ Նահանգները և Ֆրանսիայի Հանրապետությունն իրենց առաջնային պարտականությունն են համարում միջուկային զենք ունեցող պետությունների միջև պատերազմը կանխելը և ռազմավարական ռիսկերը նվազեցնելը»: ասված է հայտարարության մեջ։
«Մենք հայտարարում ենք, որ միջուկային պատերազմում հաղթողներ չեն կարող լինել, և այն երբեք չպետք է սանձազերծվի։ Քանի որ միջուկային զենքի օգտագործումը կունենա հեռուն գնացող հետևանքներ, մենք նաև վերահաստատում ենք, որ միջուկային զենքերը, քանի դեռ դրանք գոյություն ունեն, պետք է ծառայեն պաշտպանական նպատակներին, զսպեն ագրեսիան և կանխեն պատերազմները: Մենք կարծում ենք, որ պետք է կանխել նման զենքերի հետագա տարածումը»,- ընդգծել են ստորագրող երկրները։
«Մենք վերահաստատում ենք միջուկային սպառնալիքներին հակազդելու կարևորությունը և շեշտում ենք մեր երկկողմ և բազմակողմ համաձայնագրերն ու պարտավորությունները չտարածման, զինաթափման և սպառազինությունների վերահսկման ոլորտում պահպանելու և հավատարիմ մնալու կարևորությունը։ Մենք հավատարիմ ենք մնում Միջուկային զենքի չտարածման մասին պայմանագրով (NPT) մեր պարտավորություններին, պարտավորվում ենք VI-րդ հոդվածի համաձայն՝ «բարեխղճորեն բանակցել մոտ ապագայում միջուկային սպառազինությունների մրցավազքին վերջ դնելու և միջուկային զինաթափմանը զարկ տալու համար»,- ասված է հայտարարության մեջ։
«Մենք ընդգծում ենք բոլոր պետությունների հետ աշխատելու մեր հանձնառությունը՝ ստեղծելու անվտանգության միջավայր, որն ավելի նպաստավոր է զինաթափման հարցում առաջընթացի համար՝ միջուկային զենքից զերծ աշխարհ կառուցելու վերջնական նպատակով՝ առանց որևէ մեկի անվտանգությանը վտանգելու։ Մենք մտադիր ենք շարունակել երկկողմ և բազմակողմ դիվանագիտական մոտեցումներ փնտրել՝ ռազմական առճակատումից խուսափելու, կայունությունն ու կանխատեսելիությունը բարձրացնելու, փոխըմբռնումն ու վստահությունը բարձրացնելու և սպառազինությունների մրցավազքը կանխելու համար, որեւէ մեկի օգուտ չի բերում և սպառնալիք է դառնում բոլորի համար։ Մենք վճռական ենք` վարելու կառուցողական երկխոսություն՝ հիմնված փոխադարձ հարգանքի և անվտանգության ոլորտում միմյանց շահերի ու մտահոգությունների ճանաչման վրա»,- ասված է փաստաթղթում։
