ԲՏ արտադրանքը Հայաստանից արտահանման ընդամենը 1-1,5 տոկոսն է, թեև գերակա ոլորտ է․ Քերոբյան

Հայաստանի արտահանման մեծ մասը հանքահումքային արտադրանքն է՝ շուրջ 60 տոկոս։ Այս մասին այսօրվա առցանց ասուլիսին ասաց էկոնոմիկայի նախարար Վահան Քերոբյանը։ Մեկ այլ խոշոր խումբ, ըստ նախարարի, գյուղատնտեսական արտադրանքի արտահանումն է։

Նրա խոսքով՝ Հայաստանում ավելի քիչ են միջին տեխնոլոգիական արտադրանքի արտահանումները, իսկ բարձր տեխնոլոգիականը, ըստ Քերոբյանի, ընդամենը 1-1,5 տոկոս է։ Քերոբյանը ընդգծում է, որ սա խնդիր է, քանի որ ՏՏ ոլորտը Հայաստանում գերակա ոլորտ է հռչակված։

Քերոբյանը բացատրում է, որ քանի դեռ Հայաստանի արտահանման մեծ մասը հանքահումքային ու գյուղատնտեսական արտադրանքն է, ճանապարհների, կոմունիկացիաների բացումը զգալիորեն կարող է իջեցնել արտահանվող ապրանքների վերջնական գինը, հետևաբար և կարող է դրական անդրադառնալ արտահանման ծավալի վրա։

Նրա խոսքով, սակայն, քայլեր են ձեռնարկում բարձր տեխնոլոգիական ապրանքների արտահանումը մեծացնելու համար։

Ինչ վերաբերում է Թուրքիայից ապրանքների ներկրման արգելքին, Քերոբյանն ասաց, որ դա քաղաքական որոշում է եղել պատերազմի ընթացքում, և հիմա էլ քաղաքական դրդապատճառներով կարող է փոփոխվել այդ որոշումը։ Չնայած դրան՝ ըստ Քերոբյանի, թուրքական լիրայի արժեզրկման ֆոնին թուրքական ապրանքներն էժանացել են, և Հայաստանում հայտնվելու դեպքում դրանք կարող են վտանգել հայկական արտադրությունները։

«Կառավարությունում այս հարցի վերաբերյալ միասնական որոշում չկա։ Վերջնական որոշում կկայացվի վաղը», – նշեց Քերոբյանը։

Նրա խոսքով՝ տարվա ընթացքում ուսումնասիրել են արգելքի դրական և բացասական ազդեցությունները Հայաստանի տնտեսության վրա։