15.11.2024 | 21:20
Խիստ հակասական COP29. մասնագետները կլիմայի շուրջ բանակցություններն այլևս արդյունավետ չեն համարում
Թուրքիայի մեջլիսի հայ պատգամավոր Կարո Փայլանը կարող է զրկվել անձեռնմխելիությունից
Քաղաքականություն
12.04.2018 | 20:37
Անկարայի գլխավոր հանրապետական դատախազությունը պահանջել է դադարեցնել ընդդիմադիր քրդամետ «Ժողովուրդների դեմոկրատական» կուսակցության (HDP-ԺԴԿ) 8 պատգամավորների անձեռնմխելիությունը։ Մեղադրյալների թվում է նաև ԺԴԿ-ի հայ պատգամավոր Կարո Փայլանը. փոխանցում է ermenihaber-ը:
Փայլանը մասնավորապես մեղադրվել է 2017թ մայիսի 1-ին Կանադայում տված մի հարցազրույցի ժամանակ «Թուրք ազգին և թուրքական պետությունը հրապարակայնորեն ստորացնելու» և «հանրապետության նախագահին» վիրավորելու մեջ։
Մեղադրվող պատգամավորների թվում են նաև Օսման Բայդեմիրը, Ալիջան Օնլյուն, Ֆելեքնաս Ուջան, Սիբել Յիղիթալփը, Նադիր Յըլդըրըմը, Դիլեք Օջալանը, Միզգին Ըրգաթը։
Պատգամավորներին առաջադրված հիմնական մեղադրանքներն են՝ «Թուրք ժողովրդին ու թուրքական պետությունը, կառավարությունը, պետության զինվորին կամ անվտանգության աշխատակցին հրապարակայնորեն ստորացնելը», «ահաբեկչական խմբավորման քարոզչություն կատարելը», «քաղաքական կուսակցությունների մասին օրենքի խախտումը» և «հանրապետության նախագահին վիրավորելը»։
Մեղադրանքի համաձայն՝ նշված անձինք իրենց ելույթներում գովերգել են Թուրքիայում ահաբեկչական խմբավորում համարվող «Քուրդիստանի բանվորական» կուսակցության (PKK-ՔԲԿ) հիմնադիր Աբդուլլահ Օջալանին, մասնակցել են զոհված «ահաբեկիչների» հուղարկավորության արարողություններին։
Անկարայի գլխավոր հանրապետական դատախազության պահանջն ուղարկվել է արդարադատության նախարարություն՝ Թուրքիայի ազգային մեծ ժողով (TBMM—ԹԱՄԺ) փոխանցելու նպատակով։
