19.12.2025 | 02:04
Կոնֆերենցիաների լիգա․ Վահան Բիչախչյանը՝ գոլի հեղինակ․ ՏԵՍԱՆՅՈՒԹ
«Ամեն երեխա կարևոր է». տիկին Նունե Սարգսյանն այցելել է «Լուսէ» սոցիալ-վերականգնողական կենտրոն
Հասարակություն
23.12.2021 | 16:36
Հանրապետության նախագահի տիկինը՝ Նունե Սարգսյանն այսօր այցելել է «Երևան իմ սեր» հիմնադրամի «Լուսէ» սոցիալ-վերականգնողական կենտրոն․ տեղեկացնում են ՀՀ նախագահի աշխատակազմից։
Կենտրոնը վերականգնողական ծառայություններ է տրամադրում տարեկան ավելի քան 200 երեխաների, որոնք ունեն զարգացման հապաղումներ և տարաբնույթ սոցիալական խնդիրներ:
«Լուսէ» կենտրոնի և «Զատիկ» աջակցության կենտրոնի սաների կողմից ներկայացվել է «Քաչալ ոզնին» ստվերների թատրոնը՝ բեմադրված տիկին Նունե Սարգսյանի համանուն հեքիաթի հիման վրա:
Ներկայացման ավարտին երեխաները պատմել են իրենց երազանքների ու ապագա նախընտրելի մասնագիտությունների մասին:
Տիկին Նունե Սարգսյանը, դիմելով երեխաներին ու միջոցառմանը ներկա ծնողներին, մասնավորապես, նշել է. «Երեխաները մեզ համար այս աշխարհում, այս կյանքում ամենակարևորն են: Ես մշտապես այս միտքն առաջնահերթ կերպով կարևորում եմ իմ ստեղծագործություններում: Իմ գրքերում ես ուզում եմ ապացուցել, որ ամեն երեխա գանձ է, ամեն երեխա կարևոր է, չի կարելի տարբերություն դնել երեխաների միջև:
Երեխաներն ունեն օվկիանոսի չափ երևակայություն: Կխնդրեմ ձեզ չսեղմել, քառակուսու մեջ չդնել նրանց երևակայությունը: Թող երազեն, թող թռչեն, թող դառնան տիեզերագնաց, արվեստագետ կամ այն, ինչ իրենք ցանկանում են»:
Միջոցառման ավարտին երեխաներին անակնկալ այցելել և ուրախացրել է Ձմեռ պապը:
