18.12.2025 | 23:24
ՀՀ տարածքում ավտոճանապարհները հիմնականում անցանելի են
Թուրքիան և Կատարը համաձայնության են եկել Աֆղանստանում Քաբուլի օդանավակայանի կառավարման վերաբերյալ
Քաղաքականություն
23.12.2021 | 18:33
Թուրքիայից և Կատարից ընկերությունները պայմանավորվել են համատեղ կառավարել Աֆղանստանի մայրաքաղաք Քաբուլի միջազգային օդանավակայանը։ Այս մասին «Անադոլու» գործակալությանը հայտնել է Թուրքիայի դիվանագիտական շրջանակների աղբյուրը։
Այդ տվյալների համաձայն՝ Անկարան և Դոհան վերջին շրջանում քննարկել են օդանավակայանի շահագործման հարցը։ Բանակցությունների արդյունքում որոշվել են երկու երկրների ընկերությունները, որոնց հանձնարարվել է հարցը վերլուծել և փոխգործակցության հուշագիր ստորագրել։ Փաստաթղթի ստորագրման արարողությունը տեղի է ունեցել 2021 թվականի դեկտեմբերի 7-ին՝ Թուրքիայի արտգործնախարար Մևլութ Չավուշօղլուի՝ Դոհա կատարած այցի ժամանակ։
Ըստ լրատվամիջոցի աղբյուրի՝ պայմանավորվածության համաձայն՝ թուրքական աշխատանքային խումբն այցելել է Դոհա՝ Քաբուլի օդանավակայանի կառավարման գործողությունները համակարգելու համար։
Դոհայում կայացած բանակցություններից հետո թուրք-կատարական պատվիրակությունը հինգշաբթի մեկնել է Քաբուլ՝ Աֆղանստանի ժամանակավոր կառավարության հետ քննարկելու օդանավակայանի շահագործման հարցը։ Պատվիրակությունը կուսումնասիրի աֆղանական կողմի դիրքորոշումն այս հարցում, որից հետո կվերլուծի հավաքված բոլոր տվյալները։
Թուրքիայի և Կատարի իշխանություններն այս հարցով պաշտոնական հայտարարություններ չեն արել։
Էմմա Չոբանյան
