05.03.2026 | 21:59
Հայաստանի մի շարք հասցեներում էլեկտրաէներգիայի անջատումներ կլինեն
Ղարիբաշվիլին ՀՀ-ի հետ հարաբերությունները իդեալական է անվանել և խոսքից գործի անցնելու կոչ արել
Քաղաքականություն
20.12.2021 | 17:39
Վրաստանը և Հայաստանը պետք է խոսքից անցնեն իրական գործի, այսօր հայտարարել է Վրաստանի վարչապետ Իրակլի Ղարիբաշվիլին Հայաստանի վարչապետ Նիկոլ Փաշինյանի մասնակցությամբ միջկառավարական տնտեսական հանձնաժողովի նիստից առաջ, գրում է Նովոստի Գրուզիան։
Նշենք, որ հանձնաժողովի նիստը պետք է տեղի ունենար դեռ 2020 թվականին, սակայն հետաձգվել էր կորոնավիրուսի համաճարակի պատճառով։
«Մենք շահագրգռված ենք, որ մեր միջև գոյություն ունեցող շատ սերտ, բարեկամական համագործակցությունը վերածվի իրական գործի։ Պետք է սերտ առևտրատնտեսական հարաբերություններ զարգացնենք, խոսենք տարածաշրջանային ծրագրերի, ենթակառուցվածքների և այլ նախագծերի մասին, որոնք կհետաքրքրեն երկու երկրներին։ Հենց այդ նպատակով էլ այսօր հավաքվել ենք»,- ասել է Ղարիբաշվիլին։
Վրաստանի վարչապետը շնորհակալություն է հայտնել իր հայ գործընկերոջն այն բանի համար, որ միջկառավարական տնտեսական հանձնաժողովի նիստն անցկացվում է վարչապետների մակարդակով՝ երկու երկրների կառավարությունների ղեկավարների միջև ձեռք բերված նախաձեռնության և պայմանավորվածության համաձայն։
«Այս տարի սա ձեր երկրորդ այցն է Վրաստան։ Սիրով ուզում եմ նշել, որ այս տարի արդեն երկու անգամ պաշտոնական այցով եղել եմ Երևանում։ Եվ սա իսկապես մատնանշում է մեր միջև առկա սերտ հարաբերությունները, համագործակցությունը, բարի կամքը։ Եվ ես ուզում եմ շնորհակալություն հայտնել ձեզ այս հարաբերությունների, այս վերաբերմունքի համար»,- ասել է Ղարիբաշվիլին:
Նա ընդգծել է, որ Նիկոլ Փաշինյանի հետ ունեցած սերտ կապերի շնորհիվ է, որ Վրաստանի և Հայաստանի միջև «իդեալական հարաբերություններ» են հաստատվել։
Տաթև Ֆռանգյան
