Քաղաքականություն
20.12.2021 | 17:54
Համացանցի թուրքական տիրույթում ակտիվորեն շրջանառվում է մի տեսանյութ, թե ինչպես է ուղիղ եթերի ժամանակ կառավարամետ HaberTürk news-ի Անկարայի թղթակիցն ապտակում Ilhas լրատվական գործակալության հետ աշխատող խմբի լրագրողին, գրում են թուրքական լրատվամիջոցները։
Միջադեպը տեղի է ունեցել իշխող «Արդարություն և զարգացում» կուսակցության քաղաքապետի աչքի առաջ։
HaberTürk-ի թղթակից Մուհարեմ Սարըքայան հարձակվել է այն ժամանակ, երբ 60-ամյա լրագրողը պատրաստվում էր հարցազրույց սկսել իշխող «Արդարություն և զարգացում» կուսակցության հարավարևելյան Գազիանթեփի քաղաքապետ Ֆաթմա Շահինի հետ: Տեսանյութից երևում է, որ Շահինը, որը նախկինում եղել է նաև ընտանիքի և սոցիալական քաղաքականության նախարարը, որևէ կերպ չի արձագանքում, երբ Սարըքայան հարձակվում է Ամհեթ Դեմիրի վրա։
Վերջինն իր հերթին ասել է, որ միջադեպը տեղի է ունեցել տեխնիկական անսարքության պատճառով՝ նշելով, որ պատրաստվում է հայց ներկայացնել HaberTürk-ի լրագրողի դեմ։
«Նա փորձեց ինձանից ներողություն խնդրել։ Ես ընդունել եմ՝ նրա տարիքը հարգելով, սակայն պատրաստվում եմ դատական գործընթաց սկսել, քանի որ նա ինձ վիրավորել է»,- ասել է Դեմիրը։
Ավելի ուշ Սարըքայան նաև Թվիթերում է ներողություն խնդրել։
Թուրքիայի մամուլի և հրատարակչական աշխատողների միությունը (DİSK Basın-İş) դատապարտել է հարձակումը՝ նշելով, որ այն լուրջ հետևանքներ է ունենալու։ Քննադատությունների ալիք է բարձրացել նաև Ֆաթմա Շահինի դեմ, որը պարզապես հետևել է միջադեպին ու որևէ կերպ չի դատապարտել այն։
Էմմա Չոբանյան
