10.02.2026 | 23:52
Հայաստանի մի շարք հասցեներում էլեկտրաէներգիայի անջատումներ կլինեն
Էրդողանը հայտարարել է, որ գործարարները, որոնք կոչ են անում փոխել իր նոր տնտեսական քաղաքականությունը, ուզում են տապալել իր իշխանությունը
Քաղաքականություն
20.12.2021 | 16:49
Թուրքիայի նախագահ Ռեջեփ Թայիփ Էրդողանը քննադատել է երկրի առաջատար գործարարների խմբին՝ իր նոր տնտեսական մոդելը քննադատության ենթարկելու համար։ Էրդողանը նրանց մեղադրել է իր կառավարությանը տապալելու դավադրության մեջ, գրում են թուրքական լրատվամիջոցները։
«Թուրք ժողովուրդը ձեզ թույլ չի տա այս կառավարությանը տապալել և փոխարինել նորով, որից կարող եք օգտվել»,- ասել է Էրդողանը։
Թուրքական Արդյունաբերության և գործարարների միությունը (TÜSİAD) օրերս կոչ էր արել կառավարությանը հրաժարվել ցածր տոկոսադրույքների վրա հիմնված դրամավարկային քաղաքականությունից, ինչն էլ լիրայի ռեկորդային անկման պատճառ է դարձել: Խումբը կոչ էր արել կառավարությանը վերադառնալ տնտեսագիտության կանոններին։
«Մի՛ փորձեք կառավարության վրա հարձակվելու տարբեր ուղիներ փնտրել։ Դուք չեք կարող մեզ հետ մրցել»,- հայտարարել է Էրդողանը։
Նա ասել է, որ գործարարների խումբը չպետք է որևէ այլ բան ակնկալի, քան տոկոսադրույքների իջեցումն է, և ընդգծել, որ շարունակելու է իր անսովոր դրամավարկային քաղաքականությունը։
Էրդողանը նշել է, որ որպես մահմեդական՝ «շարունակելու է ճանապարհը, քանի որ դա Աստծո հրամանն է»․ իսլամում արգելվում է տոկոս տալն ու ստանալը։
Թուրքիայի նախագահը շարունակում է պնդել, որ ցածր տոկոսադրույքները շահավետ են երկրի տնտեսության համար։ Երկրի Կենտրոնական բանկը նախորդ շաբաթ հիմնական տոկոսադրույքը կրկին նվազեցրել էր՝ 15-ից 14 տոկոսի, որի պատճառով լիրան նոր արժեզրկում է գրանցել։
Տարեսկզբից լիրան կորցրել է իր արժեքի ավելի քան 50 տոկոսը, իսկ գնաճը երկրում, ըստ պաշտոնական տվյալների, կազմում է 21,3 տոկոս։
Հավելենք, որ Էրդողանի հայտարարություններց հետո թուրքական լիրան արժեզրկման հերթական ռեկորդն է գրանցել՝ գերազանցելով մեկ դոլարի դիմաց 17 լիրայի շեմը։
Էմմա Չոբանյան
