Եվրոպական երկրները սկսել են նոր սահմանափակումներ մտցնել կորոնավիրուսի «օմիկրոն» մուտացիայի պատճառով

Եվրոպական երկրները հանգստյան օրերին սկսել են նոր սահմանափակումներ մտցնել կորոնավիրուսի «օմիկրոն» մուտացիայի պատճառով։ Նիդերլանդներում կիրակի սկսվել է կոշտ լոքդաունը. ամեն ինչ փակ է՝ բացի մթերային խանութներից և դեղատներից, իսկ բնակիչներին խորհուրդ է տրվում չլքել տները, գրում է BBC-ի ռուսական ծառայությունը:

Նոր սահմանափակումների մասին մտածում են նաև Գերմանիայի և Իտալիայի իշխանությունները։ Անցած շաբաթվա վերջին Բեռլինը սահմանափակեց Բրիտանիայից և եվրոպական մի շարք երկրներից մուտքը, ինչպես նաև վերադարձրեց երկշաբաթյա կարանտինը այդ երկրներից ժամանողների համար:

Բացի այդ, Գերմանիայում ցանկանում են սահմանափակել մարդկանց շփումը, իսկ Իտալիայի իշխանությունները նախատեսում են պարտադիր դարձնել փողոցում դիմակ կրելը և բացասական թեստ պահանջել հասարակական վայրեր այցելելու համար՝ ներառյալ նրանց, որոնք լիարժեք պատվաստված են:

Նոր սահմանափակումների ներդրումը չեն բացառում նաև Բրիտանիայի իշխանությունները։ Շաբաթ Լոնդոնի քաղաքապետ Սադիկ Խանը քաղաքում արտակարգ դրություն է հայտարարել՝ «օմիկրոն» տարբերակով վարակվածների թվի կտրուկ աճի պատճառով։

Միաժամանակ, ԱՄՆ-ի գլխավոր վարակաբան Էնթոնի Ֆաուչին հայտարարել է, որ երկրին սպասվում են մի քանի դժվար շաբաթներ՝ կապված «օմիկրոն» շտամով վարակների թվի աճով, և ևս մեկ անգամ կոչ է արել մարդկանց վերապատվաստել։

«Մենք զգալի բեռ կտեսնենք հիվանդանոցային համակարգի վրա երկրի մի քանի շրջաններում, հատկապես՝ այն տարածքներում, որտեղ պատվաստումների մակարդակը ցածր է», – ասել է նա CNN-ին:

Ամերիկյան լրատվամիջոցները հայտնել են, որ շատ հիվանդանոցներ արդեն գերծանրաբեռնված են մարդկանցով, որոնք շտապ օգնություն են ստանում, ինչպես նաև «դելտա» տարբերակով վարակվածներով, հետևաբար, պատրաստ չեն «օմիկրոն»-ով նոր հիվանդների հոսքին:

Տաթև Ֆռանգյան