Թուրքիան տառապում է քրոնիկ գնաճից Էրդողանի սխալ քաղաքականության պատճառով․ Ալի Բաբաջան

Թուրքիայի ընդդիմադիր «Ժողովրդավարություն և առաջընթաց» կուսակցության (DEVA) նախագահ, նախկին փոխվարչապետ, նախկին ԱԳ նախարար Ալի Բաբաջանը հայտարարել է, որ երկիրը թևակոխել է քրոնիկ գնաճի փուլ՝ քննադատելով նախագահ Ռեջեփ Թայիփ Էրդողանի տնտեսական քաղաքականությունը։ Այս մասին գրում է Duvar-ը։

Բաբաջանը մեկնաբանել է նախագահի կողմից դեկտեմբերի 16-ին հայտարարված նվազագույն աշխատավարձի բարձրացումը՝ նշելով, որ «այն կհալվի, եթե քաղաքացիները նույնիսկ չծախսեն»։

Ասելով, որ նվազագույն աշխատավարձը կվճարվի հունվարի վերջին, իսկ լիրան նոյեմբերի 1-ից մեծապես արժեզրկվել է, Բաբաջանը նշել է, որ լիրայի արժեքի կորուստը կազդի քաղաքացիների վրա հունվարի, փետրվարի, մարտի և ապրիլի գնաճով։

«Նվազագույն աշխատավարձը, որը հայտարարվել է, սկսելու է հալվել հունվարի վերջից՝ առանց նույնիսկ ծախսելու։ Ցավում եմ, սակայն Թուրքիան մտել է գնաճի քրոնիկական շրջան»,- ասել է նա։

Թուրքիայում նվազագույն աշխատավարձը բարձրացրել է 50%-ով՝ կազմելով ամսական 4250 լիրա (265 դոլար)՝ արժույթի անկման և գնաճին դիմակայելու համար։

Նշենք, որ նախօրեին էլ Կենտրոնական բանկը նվազեցրել էր բազային տոկոսադրույքը Էրդողանի տնտեսական ծրագրի շրջանակում։

Սեպտեմբերից 500 բազային կետով նվազման վերաբերյալ Էրդողանի որոշումը հանգեցրել է ավելի քան 21% գնաճի, իսկ հաջորդ տարի, հավանաբար, այն կհասնի 30%-ի՝ ներմուծման գների «փուչիկների» պատճառով։

Մեկնաբանելով Կենտրոնական բանկի քայլը՝ Բաբաջանը նշել է, որ նախագահը սխալ քաղաքականություն է վարում։

«Արդյունքում լիրան արժեզրկվել է և շարունակում է արժեզրկվել: Չե՞ք հասկանում, որ դրա պատճառով գները բարձրանում են, աղքատությունն ու սովն ավելանում են»,- ասել է DEVA-ի ղեկավարը՝ հավելելով․ «Տոկոսադրույքների իջեցման ճանապարհը  հրամաններով չէ։ Տոկոսադրույքները կարող են իջեցվել միայն օրենքի, արդարության, ժողովրդավարության և մարդու իրավունքների հարգման, ինչպես նաև ընդունակ, որակյալ և ազնիվ կադրերի ներգրավման միջոցով։ Սա ամոթ է։ Հրաժարվե՛ք այս համառությունից և սխալ քաղաքականությունից»։

Էմմա Չոբանյան