09.01.2026 | 09:53
Երեկ Ադրբեջանի տարածքով Հայաստան է մտել 8485 տոննա ռուսական հացահատիկ․ ադրբեջանական նավթամթերքը ճանապարհին է․ Գևորգ Պապոյան
Ադրբեջանի իշխանություններն ահաբեկչության անհիմն մեղադրանքներն օգտագործում են ընդդիմության դեմ պայքարի համար․ ԱՄՆ Պետքարտուղարություն
Քաղաքականություն
17.12.2021 | 18:07
ԱՄՆ Պետքարտուղարությունը Ահաբեկչության դեմ պայքարի տարեկան զեկույցում նշում է, որ Ադրբեջանի իշխանությունները փորձում են քաղաքական ընդդիմությանն ու կրոնական ակտիվիստներին ներկայացնել որպես ահաբեկիչների կամ նրանց գործողությունները որակել ահաբեկչություն կամ ծայրահեղականություն, գրում է «Թուրան» գործակալությունը։
Հրապարակված զեկույցում ասվում է, որ Ադրբեջանում ահաբեկչական գործողություններ տեղի չեն ունեցել։ Միաժամանակ, նշվում է, որ երկրի իրավապահ մարմինները շատ կամայականորեն են այս կամ այն գործողությունները որակում որպես ահաբեկչություն կամ ծայրահեղականություն, որը քաղաքական ընդդիմախոսներին ու կրոնական ակտիվիստներին դարձնում է դատական հետապնդումների, ձերբակալությունների ու խոշտանգումների օբյեկտ։
«Այդպիսի մարդիկ հատկապես խոցելի են Ներքին գործերի նախարարության կազմակերպված հանցավորության դեմ պայքարի բաժնի կողմից իրականացվող ֆիզիկական բռնության դեմ»,- ասվում է զեկույցում։
Որպես օրինակ՝ նշվում է ընդդիմադիր «Ժողովրդական ճակատ» կուսակցության անդամ Նիայամեդդին Ահմեդովի գործը, որը 13 տարվա ազատազրկման է դատապարտվել ահաբեկչության ֆինանսավորման համար։ Ահմեդովը ձերբակալվել է 2020 թվականին և ի սկզբանե մեղադրվել կարանտինային կանոնները խախտելու համար, որոնք սահմանվել էին կորոնավիրուսի տարածումը կանխելու նպատակով։ Ավելի ուշ նրան ահաբեկչության ֆինանսավորման մեղադրանք է առաջադրվել։ Իրավապաշտպան կազմակերպությունները նրան քաղբանտարկյալ են համարում՝ մեղադրանքն անվանելով «աբսուրդ»։
Էմմա Չոբանյան
