Ինչպիսի՞ն են Փաշինյան-Ալիև բրյուսելյան հանդիպումների արդյունքները․ ՈՒՇԱԴՐՈՒԹՅԱՆ ԿԵՆՏՐՈՆՈՒՄ․ ՏԵՍԱՆՅՈՒԹ

Factor TV-ի «Ուշադրության կենտրոնում» հաղորդաշարի այս թողարկումը Բրյուսելում կայացած Արևելյան գործընկերության գագաթնաժողովի արդյունքների մասին է։

Քաղաքագետ Դավիթ Ստեփանյանը, խոսելով գագաթնաժողովի շրջանակում տեղի ունեցած Փաշինյան-Ալիև հանդիպումից, նշեց, որ այն, ինչ տեղի ունեցավ Բրյուսելում, Սոչիի տրամաբանական շարունակությունն է։

«Կարծում եմ, որ այն ամեն հարցերում, որ վերաբերում են հումանիտար ոլորտին, Ռուսաստանը նախընտրում է աշխատել Եվրոպայի հետ։ Ռուսական կողմը մեկ մոնոպոլիա է պահում Հարավային Կովկասում՝ ռազմականը, այստեղ պետք է ուրիշ երկրների զորքեր չլինեն»,- ասաց նա։

Ռազմաքաղաքական հարցերով փորձագետ Արեգ Քոչինյանի խոսքով էլ՝ բրյուսելյան հանդիպումը կարևոր էր, քանի որ 44-օրյա պատերազմից հետո ստեղծվել է եռակողմ ձևաչափ, որն իրականում քառակողմ է (նկատի ունի Թուրքիան – խմբ․), և որը չի բխում Հայաստանի ո՛չ երկարաժամկետ, ո՛չ էլ միջնաժամկետ շահերից։

«Միևնույն ժամանակ, 44-օրյա պետարազմից հետո Հայաստանը չուներ հնարավորություններ՝ ամորտիզացնելու այդ քառակողմ ձևաչափում տեղի ունեցող գործընթացները, դրա համար շատ կարևոր էր, որ դրան զուգահեռ գործընթաց լիներ»,- ասաց նա։

Ըստ Քոչինյանի՝ դեռ չի կարելի տեղի ունեցող գործընթացը համարել Արևմուտքի ակտիվացում այստեղ, բայց դա այդ ուղղությամբ արված քայլ էր։ Նրա խոսքով՝ ԵՄ-ն, Հայաստանի և Ադրբեջանի միջև սահմանազատման գործընթացում մասնագիտական և տեխնիկական աջակցություն ցուցաբերելով, հայտարարում է իր քաղաքական աջակցության մասին։

«Քաղաքացու որոշում» սոցիալ-դեմոկրատական կուսակցության անդամ Միքայել Նահապետյանի խոսքով էլ՝ կարևոր է դիտարկել, թե ինչ ֆոնի վրա է տեղի ունենում իրադարձությունը։

«Երբ դու կազմակերպում ես միջոցառում, որին ակտիվ եռացող կոնֆլիկտի կողմեր են մասնակցելու, քո անձնական քաղաքական քաշի և քո ներկայացրած աշխարհաքաղաքական կենտրոնի կշռի հարցն է՝ այնտեղ կողմերի միջև առերեսում կազմակերպելը։ Ինչքան կտևի, ինչ հարցեր կքննարկվեն՝ դա արդեն խնդրի երկրորդական, բայց ոչ պակաս կարևոր կողմն է»,- ասաց նա։

Մանրամասները՝ տեսանյութում։

Հռիփսիմե Հովհաննիսյան