27.10.2026 | 00:08
Վարդան Մինասյանն աշխատանքի է անցել Լիբանանում
ՀՀ քաղաքացիները սկսել են ավելի քիչ դիմել ԵՄ երկրներ՝ ապաստանի համար․ Միգրացիոն ծառայության պետ․ ՏԵՍԱՆՅՈՒԹ
Քաղաքականություն
15.12.2021 | 17:25
«Երբ որ շրջանառու, անվտանգ միգրացիայի կազմակերպման բոլոր հիմնարար պայմանները իրականություն լինեն, մենք արդեն կարող ենք խոսել վիզաների ազատականացման գործընթացի շուրջ երկխոսության մեկնարկի մասին»,- «Միգրացիոն հոսքեր, խնդիրներ, կառավարում» թեմայով քննարկման ժամանակ այս մասին նշեց Տարածքային կառավարման և ենթակառուցվածքների նախարարության Միգրացիոն ծառայության պետ Արմեն Ղազարյանը:
Անդրադառնալով միգրացիոն խնդիրներին և դրանց կառավարմանը՝ Ղազարյանը նշեց, որ համաձայնագրի 15-րդ հոդվածում ուղիղ տեքստով նշված է՝ երբ կարող ենք սկսել վիզաների ազատականացման երկխոսությունը: Նրա խոսքով՝ բացի համաձայնագրից Եվրոպական միության հետ մեր հարաբերությունները միգրացիայի ոլորտում ձևակերպվում են նաև գործող երկու համապարփակ պայմանագրերով: Մեկը՝ Հայաստանի և ԵՄ-ի միջև վիզաների դյուրացման մասին համաձայնագիրն է և՝ ռեադմիսիայի մասին համաձայնագիրը:
Ինչ վերաբերում է ԵՄ-Հայաստան համապարփակ համաձայնագրին, Ղազարյանը նշեց, որ այնտեղ անդրադարձ կա Հայաստանից գնալու հիմնական պատճառներին, համատեղ միջազգային պաշտպանության և ապաստանի համակարգերի զարգացման գործընթացին, քսենաֆոբիային, ռասիզմի դեմ պայքարին, ինչպես նաև շրջանառու միգրացիայից, վերադարձի հոսքերից օգուտներ քաղելու գործիքների մշակմանը:
«Տեղեկատվության եւ փաստաթղթերի իսկության վերաբերյալ համագործակցությունը նույնականացման գործընթացներում խիստ կարեւոր են. Դրանք առնչվում են մեր քաղաքացիների անձնական տվյալների պաշտպանությանը: Անձի ինքնությունը կարող են գողանալ, օրինակ՝ գողանալով փաստաթղթերը եւ ձեւանալով որպես երրորդ անձ՝ հատկապես՝ երկրից դուրս գնալիս: Այդ բոլորը հիմքեր են ստեղծում թրաֆիկինգի, անօրինական միգրացիայի կազմակերպման համար: Համաձայնագրում եւս կա թրաֆիկինգի դեմ պայքարի համատեղ գործիքների մշակում, անօրինական միգրացիայի կազմակերպման մեխանիզմների խափանում, որը նաեւ իրավապահների հետ համատեղ գործակցությամբ է տեղի ունենում»,- նշեց Միգրացիոն ծառայության պետը:
Միգրացիոն ծառայության պետի հավաստմամբ՝ ՀՀ քաղաքացիներն ապաստանի համար ավելի քիչ են սկսել դիմել ԵՄ անդամ երկրներին:
Մանրամասները՝ տեսանյութում:
