13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Ղարիբաշվիլին հայտարարել է, որ Վրաստանը պատրաստ է անդամակցել ՆԱՏՕ-ին, Ստոլտենբերգն արձագանքել է Թբիլիսիի ցանկությանը
Քաղաքականություն
15.12.2021 | 18:44
Վրաստանը զգալի առաջընթաց է գրանցել ՆԱՏՕ-ին ինտեգրվելու ուղղությամբ, և եկել է ինտեգրման գործընթացն աշխուժացնելու ուղղությամբ կոնկրետ քաղաքական որոշումներ կայացնելու ժամանակը։ Այս մասին Բրյուսելում ՆԱՏՕ-ի գլխավոր քարտուղար Յենս Ստոլտենբերգի հետ հանդիպման արդյունքներով կայացած մամուլի ասուլիսում ասել է Վրաստանի վարչապետ Իրակլի Ղարիբաշվիլին։
«Վրաստանը զգալի առաջընթաց է գրանցել եվրատլանտյան ինտեգրման ճանապարհին։ Հավատում եմ, որ եկել է կոնկրետ քաղաքական որոշումներ կայացնելու ժամանակը՝ ակտիվացնելու մեր ինտեգրացիոն գործընթացը։ Սա հստակ ազդանշան կլինի ՆԱՏՕ-ի ասպիրանտ բոլոր երկրների համար, որ նպատակաուղղվածությունը, նվիրվածությունը և աշխատանքը բերում են իրական արդյունքների»,- ասել է Ղարիբաշվիլին։
Վրաստանի վարչապետն ընդգծել է, որ Վրաստանն արդեն ունի բոլոր գգործիքները ՆԱՏՕ-ին անդամակցելու համար, և հանրապետությունը բանակցություններ է վարում գործընկերների հետ՝ դաշինքին իր անդամակցության վերաբերյալ քաղաքական որոշում պատրաստելու համար։
«Ես բազմիցս ասել եմ և հիմա էլ կկրկնեմ, որ ՆԱՏՕ-ին անդամակցելը Վրաստանի համար ամենակարևոր խնդիրն է, որին աջակցում է վրաց ժողովրդի բացարձակ մեծամասնությունը։ Մենք արդեն ունենք անդամակցության բոլոր գործնական գործիքները։ Մենք ակտիվ երկխոսություն ենք վարում դաշնակիցների հետ՝ ՆԱՏՕ-ին Վրաստանի անդամակցության վերաբերյալ քաղաքական որոշում նախապատրաստելու համար»,- ասել է նա։
Վրաստանի կառավարության ղեկավարը նաև նշել է, որ 2008 թվականին Բուխարեստում ՆԱՏՕ-ի գագաթնաժողովում ընդունված որոշումը, որ Վրաստանն ու Ուկրաինան կդառնան դաշինքի անդամ, այսօր էլ արդիական է մնում։
ՆԱՏՕ-ի գլխավոր քարտուղար Յենս Ստոլտենբերգը չի նշել Վրաստանի՝ դաշինքին անդամակցելու ժամկետները՝ ուշադրություն հրավիրելով բարեփոխումների հետագա շարունակման անհրաժեշտության վրա, և դա ուղղակիորեն կապել է երկրում քաղաքական ճգնաժամի հանգուցալուծման հետ, գրում է Sputnik-ի վրացական ծառայությունը։
«ՆԱՏՕ-ն ակնկալում է, որ Վրաստանը հավատարիմ կմնա ժողովրդավարական չափանիշներին, որոնց մշակման համար այդքան ջանասիրաբար աշխատել է վերջին տարիներին»,- ասել է նա:
«Ծայրահեղ կարևոր է դատաիրավական բարեփոխումների, ԶԼՄ-ների ազատության և անվտանգության ոլորտի հաշվետվողականության ուղղությամբ աշխատանքը: Ես նաև կոչ եմ անում ձեզ աշխատել ընդդիմության հետ՝ լուծելու քաղաքական տարաձայնությունները և նվազեցնելու բևեռացնող հռետորաբանությունն ու գործողությունները»,- հավելել է Ստոլտենբերգը:
Տաթև Ֆռանգյան
