Բաքվի գերությունից` Երևանի բանտեր. ինչու են կալանավորում զինծառայողներին․ ՏԵՍԱՆՅՈՒԹ

Բաքվի գերությունից ազատված և հայրենիք վերադարձած զինվորներին, պարզվեց, սպասում են բանտային ճաղեր արդեն Հայաստանում: Ընդամենը վեց օր առաջ հայրենիք վերադարձած տասը գերիներից հինգին ՔԿ-ն մեղադրում է Քրեական օրենսգրքի 365 հոդվածի 3-րդ մասով՝ մարտական հերթապահություն կամ մարտական ծառայություն կրելու կանոնները խախտելու համար, որն առաջացրել է ծանր հետևանքներ։ Քննչական կոմիտեի միջնորդությամբ հինգից երկուսին կալանավորել են, մեկն ազատ է արձակվել, վերջին երկուսի մասին տեղեկություններ հայտնի չեն:

Դեկտեմբերի 4-ին Հայաստան վերադարձված գերիներից լեյտենանտ Սերժիկ Ամիրխանյանի և պայմանագրային զինծառայող Ռոբերտ Նազարյանի կալանքի միջնորդությունները բավարարվել են: Սերժիկ Ամիրխանյանը կալանավորվել է 2 ամիս ժամկետով և տեղափոխվել «Նուբարաշեն» ՔԿՀ, Ռոբերտ Նազարյանը կալանավորվել է մեկ ամիս ժամկետով: Դատարանը մերժել է նախկին գերիներից կոչումով մայոր, գումարտակի հրամանատարի տեղակալ Նարեկ Երիմյանին կալանավորելու միջնորդությունը։

Հիշեցնենք՝ այս զինծառայողները գերեվարվել էին այս տարվա նոյեմբերի 16-ին՝ Սյունիքի և Վայոց ձորի սահմանագոտում ծավալված արյունալի մարտերի օրը։ Այդ օրը հայկական կողմը երկու դիրք էր կորցրել։

Գերությունից վերադարձածներին դատում են քաղաքական ղեկավարության ցուցումով, պնդում է տասնամյակներ շարունակ զինվորների խնդիրներով զբաղվող իրավապաշտպան Ժաննա Ալեքսանյանը:

Հիշեցնենք՝ Նիկոլ Փաշինյանն այս զինծառայողների գերեվարման հենց հաջորդ օրն էր ասել, որ անհրաժեշտություն կա պարզել՝ ի՞նչ հանգամանքերում են նրանք գերեվարվել:

Մինչ այդ՝ նախընտրական քարոզարշավի ժամանակահատվածում, երբ Փաշինյանին խիստ անհրաժեշտ էր քաղաքացիների աջակցությունը, նա Բաքվում պահվող գերիների մասին դրական էր արտահայտվում և փորձագիտական շրջանակների համար տարակուսանք առաջացնող հայտարարություններ անում:

«Այդ տղաները Բաքվի բանտերում պայքարում են Հայաստանի անկախության համար, ինքնիշխանության համար, և նրանք մեզ կներեն մեկ-երկու ամիսներ ավելի մնալու համար, բայց իրենք մեզ չեն ների, եթե մենք զիջենք մեր երկրի անկախությունն ու ինքնիշխանությունը»,- ասել էր Փաշինյանը:

Փաշինյանի ելույթից հետո գերիները Բաքվի բանտերում ոչ թե երկու, այլ արդեն յոթ ամիս են պահվում: Ներե՞լ են Փաշինյանին ու իր թիմին, վարչապետի թիմակիցներից Էդուարդ Աղաջանյանն այս հարցին լայն ժպիտով այսպիսի մեկնաբանություն է տալիս․ «Ես այդ հարցն ընկալում եմ հռետորական հարց: Ես կարծում եմ՝ ձեր հարցը հռետորական է»։

Իրավապաշտպան Ժաննա Ալեքսանյանն անմարդկային է համարում իշխանությունների գոծելաոճն այն ֆոնին, երբ գերությունից վերադարձածներին չեն թողնում վերականգնվել և նոր միայն կալանավորել:

Փաշինյանի մեկ այլ թիմակից, նրա հետ ազգակցական կապեր ունեցող պատգամավոր Հրաչյա Հակոբյանը չգիտի՝ ինչ վիճակում են գերությունից վերադարձածները, բայց նա հանցագործներին ճաղերի հետևում տեսնելու ցանկություն ունի:

Պետք է պարզվի, թե ինչ հանգամանքերում են նրանք գերի ընկել և վերջ, նշում է Հակոբյանն ու շեշտում՝ ավելին չի ցանկանում ասել:

Պաշտպանության նախկին նախարար Սեյրան Օհանյանն էլ ակնկալում է, որ ոչ միայն զինվորները, այլ նաև նրանց վերադասները պատասխանատվության կենթարկվեն, այդ թվում՝ քաղաքական:

Գերիների կալանավորումը հաջորդում է ԱԺ նախագահ Ալեն Սիմոնյանի այն հայտարարությանը, թե զինծառայողները դասալիք են, զենքերը դրել և հանձնվել են:

Հավելենք, որ նախօրեին էլ հրապարակվել էին Խծաբերդում գերեվարված տասը զինծառայողների ցուցմունքերը, որտեղ նկարագրվում էր, թե ինչպես են զինվորներն առանց կրակելու զենքերը դրել և հանձնվել թշնամուն: Իրավապաշտպանները գերությունից վերադարձածներին այսօրինակ թիրախավորելն անընդունելի են համարում:

Մանրամասները՝ տեսանյութում։

Նարեկ Կիրակոսյան