Թուրքիայում տնտեսական ճգնաժամի պայմաններում մարդիկ ստիպված վաճառում են իրենց հագուստն ու այլ իրեր՝ սնունդ գնելու համար

Թուրքիայում մարդիկ վաճառում են սեփական հագուստը, որպեսզի կարողանան ուտելիք գնել ներկա տնտեսական ճգնաժամի պայմաններում, գրում է թուրքական Cumhurriyet-ը։

Քանի որ լիրան շարունակում է անկում ապրել, գործազրկությունն աննախադեպ մակարդակի է հասել, ապրանքների գները բարձրանում են, ավելի ու ավելի շատ մարդիկ փորձում են դիմակայել գնողունակության նվազմանը: Նշվում է, որ Ստամբուլի Սքյութար թաղամասը լցված էր ուսանողներով, որոնք օգտագործված իրեր էին ձեռք բերում, հիմա այն լի է մարդկանցով, որոնք փորձում են վաճառել իրենց իրերը։

«Ես ստիպված վաճառում եմ իմ բաճկոնը՝ գումար ձեռք բերելու համար»,- լրատվամիջոցին պատմել է խանութ գնացող քաղաքացիներից մեկը։

Second hand խանութի սեփականատեր Հուսեյն Աքյուզն ասել է, որ իրավիճակը գնալով վատանում է։

«Մի կին ինձ տուն կանչեց մեկ ամիս առաջ՝ բազմոց և մահճակալ վաճառելու համար։ Ես տեսա, որ երեխան լաց էր լինում, հավանաբար՝ սովից։ Կինն արցունքոտ աչքերով էր։ Նա ասաց՝ մենք կարող ենք 80 լիրայով բավարարվել։ Չդիմացա, 100 լիրա տվեցի, կահույքն էլ չվերցրի ու գնացի»,- պատմել է Աքյուզը։

Մեկ այլ խանութի սեփականատեր Մուրաթ Դինջն էլ պատմել է, որ մի տարեց տղամարդ վաճառել է իր հեռուստացույցը, որպեսզի կարողանա վճարել թոռան վարկային քարտի պարտքը։

«Նա այն ինձ վաճառեց 900 լիրայով։ Եթե ցանկանա նորը գնել, պետք է վճարի 3000 լիրա»,- ասել է Դինչը՝ հավելելով, որ մարդկանց մեծ մասը նորի փոխարեն օգտագործված ապրանք է գնում։ Նա ասել է նաև, որ նույնիսկ ինքն է օգտագործված ապրանք գնում։

Հաճախորդների պաշտպանության ասոցիացիայի (TÜKODER) ղեկավար Ազիզ Քոչալի խոսքով՝ աղքատության պատճառով սոցիալական պայթյուն է սպասվում։

«Մենք տեսնում ենք, որ մարդիկ գնում են տեխնիկա կամ կահույք ապառիկով ու կանխիկ վաճառում դրանք՝ իրենց հիմնական կարիքները բավարարելու համար։ Մարդիկ օգտագործում են այս մեթոդը՝ ողջ մնալու համար»,- Cumhuriyet-ին ասել է Քոչալը՝ հավելելով․ «Կարող են լինել սոցիալական պայթյուններ, փլուզված ընտանիքներ և ինքնասպանություններ։ Այն համակարգը, որը ստիպում է մարդկանց այսպես ապրել, մեղավոր է»։

Էմմա Չոբանյան