13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Էրդողանը հայտարարել է, որ Թուրքիան չի ճանաչում ԵՄ որոշումները
Քաղաքականություն
08.12.2021 | 19:01
Թուրքիայի նախագահ, երկրի իշխող «Արդարություն և զարգացում» կուսակցության ղեկավար Ռեջեփ Թայիփ Էրդողանը Կատարից վերադառնալիս պատասխանել է լրագրողների հարցերին՝ անդրադառնալով նաև Եվրոպայի խորհրդի Նախարարների կոմիտեի որոշումներին, գրում է Bianet-ը։
Հիշեցնենք, որ ԵԽ Նախարարների կոմիտեն նախորդ շաբաթ եռօրյա քննարկումների արդյունքում որոշել է վարույթ սկսել Թուրքիայի դեմ՝ իրավապաշտպան Օսման Քավալային և քրդամետ Ժողովուրդների դեմոկրատական կուսակցության նախկին նախագահ Սելահեթթին Դեմիրթաշին անմիջապես ազատ արձակելու պահանջով մարդու իրավունքների խախտման վճիռը և ՄԻԵԴ-ի որոշումը չկատարելու համար։
Այս մասին հարցին ի պատասխան՝ Էրդողանն ասել է․ «Ես չեմ կարող մեկնաբանել դա։ Մենք չեն ճանաչում Եվրամիության որոշումները Քավալայի, Դեմիրթաշի և մյուսների մասով։ Սա շատ պարզ է։ Մենք ենթադրում ենք, որ «դրանք գոյություն չունեն»: Մեր աչքում դրանք անվավեր են: Մենք դա բացատրել ենք անընդհատ: Նրանք պետք է հասկանա՞ն, թե՞ ոչ։ Մենք ԵՄ որոշումները չենք ճանաչում մեր արդարադատության կայացրած որոշումներից վեր։ Նրանք կարող են անել այն, ինչ ճիշտ են գտնում»։
Նշենք, որ բարերար, իրավապաշտպան Օսման Քավալան կալանավորվել է 2017 թվականին Ստամբուլի Գեզի այգու ցույցերը կազմակերպելու մեղադրանքով։ Թուրքական դատարանը նրան արդարացրեց 2020 թվականի փետրվարին, սակայն 2016-ին ռազմական հեղաշրջման փորձի գործով, լրտեսության և սահմանադրական կարգը խախտելու համար, Քավալան կրկին ձերբակալվեց։ Նա աշխարհի տարբեր իրավապաշտպան կազմակերպությունների կողմից համարվում է քաղբանտարկյալ։ Ինքը՝ Քավալան իրեն առաջադրված մեղադրանքները չի ընդունում՝ դրանք քաղաքական որակելով։
Հավելենք, որ անցյալ ամիս էլ Թուրքիայում արևմտյան 10 երկրների դեսպաններ հայտարարություն էին տարածել՝ Քավալային ազատ արձակելու կոչով։
Էմմա Չոբանյան
