04.02.2026 | 23:29
ՇՄ նախարարը և Դևիդ Կուպերը քննարկել են «Կենսաբանական բազմազանության մասին» կոնվենցիայի ներքո ընթացող գործընթացներ
Բաքվում ոստիկանությունն ուժով հեռացրել է նախագահականի մոտ բողոքի ակցիա իրականացնողներին․ ԼՈՒՍԱՆԿԱՐՆԵՐ
Քաղաքականություն
07.12.2021 | 14:27
Բաքվում «Տերտերի գործով» դատապարտվածների հարազատները փորձել են բողոքի ակցիա անցկացնել նախագահականի դիմաց՝ պահանջելով վերանայել մեղադրանքները, գրում է «Թուրան» գործակալությունը։
Ակցիան նախատեսված է եղել ժամը 11։00-ին։ Ցուցարարները հավաքվել են մետրոյի «Իչերի շեհեր» կայարանի մոտ ու շարժվել նախագահական նստավայրի ուղղությամբ։ Ոստիկանության ուժեղացված ջոկատներն ու ներքին գործերի նախարարության արագ արձագանքման գնդերը, սակայն, արագ փակել են նրանց ճանապարհը։
Ոստիկաններն առաջարկել են ակցիայի մասնակիցներից երկու հոգու գնալ նախագահականի մոտ, սակայն այնտեղից նրանց հետ են վերադարձրել։ Վերցնելով բողոքի ակցիայի մասնակիցների հայտարարությունը՝ ոստիկանները նրանց բռնի ուժով հետ են մղել դեպի մետրոյի կայարան։
«Մենք ուղղակի ցանկանում էինք մեր բողոքը հասցնել Ադրբեջանի նախագահին, իսկ մեզ նույնիսկ թույլ չտվեցին հասնել պետության ղեկավարի աշխատակազմի շենքին»,- ասել է ակցիայի մասնակիցներից մեկը։
Հավելենք, որ 2017 թվականի մայիսի 7-ին Ադրբեջանի Գլխավոր դատախազությունը, Պաշտպանության և Ներքին գործերի նախարարությունները հայտարարեցին մի խումբ զինծառայողների ու քաղաքացիական անձանց ձերբակալության մասին՝ իբր Հայաստանի օգտին լրտեսություն կատարելու մեղադրանքով, որը հայտնի է որպես «Տերտերի գործ»։
Իրավապաշտպանները նշում են, որ հարուցված քրեական գործերն անհիմն են ու կեղծ։ Հետագայում էլ հայտնի դարձավ զինվորականների խոշտանգումների ու դրանց արդյունքում սպանվածների մասին։
Էմմա Չոբանյան
