Քաղաքականություն
06.12.2021 | 20:07
ՌԴ-ն Հնդկաստանին վերաբերվում է որպես մեծ տերության՝ բարեկամական ժողովրդով։ Այս մասին հայտարարել է ՌԴ նախագահ Վլադիմիր Պուտինը Հնդկաստանի վարչապետ Նարենդրա Մոդիի հետ հանդիպմանը, գրում է ՏԱՍՍ-ը։
«Մենք Հնդկաստանին վերաբերվում ենք որպես մեծ տերության՝ մեզ համար բարեկամ ժողովրդով ու մեզ հետ հարաբերությունների հիանալի պատմությամբ։ Մեր երկրների հարաբերությունները զարգանում են՝ միտված ապագային: Եթե անցյալ տարի մենք տեսանք ապրանքաշրջանառության անկում ավելի քան 17 տոկոսով, ապա այս տարվա առաջին ինն ամիսներին աճն արդեն ավելի քան 38 տոկոս էր»,-ասել է Պուտինը։
Նա նաև նշել է, որ Ռուսաստանն ու Հնդկաստանը համագործակցում են շատ կարևոր, հեռանկարային ուղղություններում։
«Դա վերաբերում է էներգետիկային, բարձր տեխնոլոգիաներին, այդ թվում՝ տիեզերքին։ Վստահ եմ, որ այն ծրագրերը, որոնց մասին մենք խոսել ենք, կիրականացվեն, այդ թվում՝ հնդիկ տիեզերագնացների պատրաստումը»,- ասել է ՌԴ նախագահը։
Բացի այդ, նա նշել է, որ ՌԴ-ն և Հնդկաստանը համատեղ զորավարժություններ են անցկացնում և մտադիր են զարգացնել ռազմական ոլորտում համագործակցությունը։
«Մենք համատեղ զորավարժություններ ենք անցկացնում ինչպես Հնդկաստանում, այնպես էլ Ռուսաստանում։ Երախտապարտ ենք մեր աշխատանքի այս բաղադրիչին ձեր ուշադրության համար: Մենք մտադիր ենք շարունակել աշխատել այս ուղղությամբ»,- ասել է Պուտինը՝ հավելելով, որ միասին զբաղվում են նաև ռազմական բարձրտեխնոլոգիական արտադրանքի մշակմամբ ու արտադրությամբ, այդ թվում՝ Հնդկաստանի տարածքում։
Էմմա Չոբանյան
