11.10.2026 | 14:46
Այսօր աղջիկ երեխաների միջազգային օրն է
ՀԱՊԿ ռազմական կոմիտեն կքննարկի հավաքական ավիացիոն ուժերի զարգացման հեռանկարները
Քաղաքականություն
06.12.2021 | 18:31
Հավաքական անվտանգության պայմանագրի կազմակերպության (ՀԱՊԿ) անդամ երկրների զինված ուժերի գլխավոր շտաբների պետերը դեկտեմբերի 8-ին ՀԱՊԿ Ռազմական կոմիտեի նիստում կքննարկեն ռազմական անվտանգությանը սպառնացող վտանգները և հավաքական ավիացիոն ուժերի զարգացման հեռանկարները։ Այս մասին երկուշաբթի հայտնել են ՀԱՊԿ մամուլի ծառայությունից, գրում է ՏԱՍՍ-ը։
«Հավաքական անվտանգության պայմանագրի կազմակերպության անդամ երկրների ռազմական համագործակցության զարգացման ռազմական կոմիտեի նիստը տեղի կունենա դեկտեմբերի 8-ին՝ տեսակոնֆերանսի ձևաչափով: Հանդիպմանը կքննարկվեն Արևելյան Եվրոպայի, Կովկասի և Կենտրոնական Ասիայի հավաքական անվտանգության տարածաշրջաններում ռազմական անվտանգությանը սպառնացող մարտահրավերներն ու սպառնալիքները, ինչպես նաև Հավաքական ավիացիոն ուժերի հետագա զարգացման և դրանց տեղակայման ու օգտագործման ժամանակ կոալիցիոն ուժերի օդային ծածկույթի կազմակերպմանը վերաբերող հարցեր»,- ասված է հաղորդագրության մեջ։
Տեղեկացվում է, որ հանդիպմանը կմասնակցեն Հայաստանի, Բելառուսի, Ղազախստանի, Ղրղզստանի, Տաջիկստանի զինված ուժերի գլխավոր շտաբների պետերը, ՀԱՊԿ միացյալ շտաբի պետ, գեներալ-գնդապետ Անատոլի Սիդորովը և ՀԱՊԿ գլխավոր քարտուղարի տեղակալ Թախիր Խաիրուլոևը՝ ՌԴ ԶՈՒ գլխավոր շտաբի պետ Վալերի Գերասիմովի նախագահությամբ։
«Ռազմական կոմիտեի անդամներին կտեղեկացվեն ռազմական ոլորտում ՀԱՊԿ գործունեության առաջնահերթ ուղղությունների մասին, որոնք առաջարկվել են Հայաստանի Հանրապետության կողմից 2022 թվականին կազմակերպության նախագահության ընթացքում»,- ասված է հաղորդագրության մեջ։
Տաթև Ֆռանգյան
