«Մեղադրանքի բնույթը պարզ է, սակայն առաջադրված մեղադրանքը չեմ ընդունում». Շիրինյանի գործը մտավ դատաքննության փուլ

Տաթևիկ Գրիգորյանի նախագահությամբ Երևան քաղաքի ընդհանուր իրավասության դատարանում այսօր կայացած նիստի ընթացքում ՀՀ ոստիկանության նախկին բարձրաստիճան սպա Սայաթ Շիրինյանի գործը մտավ դատաքննության փուլ։

Մեղադրող դատախազ Խաչատրյանը հրապարակեց Շիրինյանին առաջադրված մեղադրանքի եզրափակիչ մասը։ Մասնավորապես, ըստ մեղադրանքի՝ 2020 թվականի դեկտեմբերի վերջին Շիրինյանը «Ֆեյսբուք» սոցցանցում առերևույթ բռնության կոչեր պարունակող գրառում է արել` ուղղված օգտատեր Սուսաննա Ավշարյանին։
«Սուսաննա Ավշարյան, եթե ես լինեի շարժումն առաջնորդողը, ապա վստահ եղեք, մենք կգնայինք կոնկրետ քայլերի, չնայած կազմակերպիչներին չեմ քննադատում, քանզի նրանք խուսափում են արյունահեղությունից: Բայց արդեն պարզից էլ պարզ է, որ առանց արյունահեղության հնարավոր չի»,– գրել էր նա։

Հրապարակումից հետո Շիրինյանը հայտարարեց՝ թեև մեղադրանքի բնույթը պարզ էր, սակայն առաջադրված մեղադրանքը չի ընդունում։

Դատարանը որոշեց ապացույցների հետազոտման հետևյալ կարգը՝ ուսումնասիրել քրեական գործում առկա ապացույցները, հրապարակել գործում առկա փաստաթղթերը, ապա հարցաքննել դատակոչված վկաներին, իսկ վերջում՝ ամբաստանյալին։ Դատական նիստը հետաձգվեց։

Ավելի վաղ դատարանը բավարարել էր պաշտպանի միջնորդությունը և Շիրինյանի նկատմամբ ընտրված խափանման միջոց ստորագրությունը վերացրել։

Հիշեցնենք՝ Սայաթ Շիրինյանը մեղադրվում է ՀՀ ՔՕ 226.2-րդ հոդվածի 1-ին մասով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը): Նրա նկատմամբ որպես խափանման միջոց է ընտրվել ստորագրությունը՝ չհեռանալու մասին:

Ռոզա Վարդանյան