Անգելա Մերկելը կանցլերի պաշտոնը թողնում է փանկ ռոքի հնչյունների ներքո

Անգելա Մերկելը պաշտոնապես լքում է Գերմանիայի կանցլերի պաշտոնը, որը նա զբաղեցնում էր 16 տարի։ Սակայն քանի դեռ խորհրդարանը չի ընտրել նրա իրավահաջորդին, նա կմնա կաբինետի ղեկավարի պաշտոնում՝ ժամանակավոր պաշտոնակատարի կարգավիճակով։

Ավանդական ռազմական արարողությունը, որը կոչվում է «Der Große Zapfenstreich» և կատարվում է Գերմանիայում՝ ի պատիվ պաշտոնաթող պետական բարձրաստիճան պաշտոնյաների և բանակի գեներալների, համարվում է Դաշնային Հանրապետության զինված ուժերը քաղաքացիական անձին մատուցված ամենաբարձր տուրքը, գրում է DW-ի ռուսական ծառայությունը:

Արարողությունը, որը միշտ անցկացվում է երեկոյան՝ ջահերի լույսի ներքո, ճշգրտորեն պլանավորված է և մշակված մինչև ամենավերջին մանրուքը։ Այն ղեկավարում է Բունդեսվերի սպա՝ առնվազն շտաբի սպայի կոչումով։ Երաժշտական մասի համար պատասխանատու է երաժշտական կորպուսի ղեկավարը։ Այս շքեղ երաժշտական ներկայացման ամենադիտարժան հատվածը ամբողջությամբ շքերթի համազգեստով, զորամասերի ջահերով երթն է։

Ավանդույթի համաձայն՝ առիթի հերոսը կարող է նախընտրել մի քանի երաժշտական ստեղծագործություն, որոնք կցանկանար լսել Բունդեսվերի նվագախմբի կատարմամբ։ Անգելա Մերկելի երաժշտական նախասիրությունները, որն իրականում հայտնի է դասական երաժշտության հանդեպ իր կիրքով, շատերի համար անակնկալ է եղել։

Հեռացող դաշնային կանցլերի խնդրանքով՝ զինվորական երաժիշտները փորձել են կատարել քրիստոնեական օրհներգը «Großer Gott, wir loben Dich» («Մեծ Աստված, մենք գովաբանում ենք քեզ»), որի խոսքերը գրել է գերմանացի կաթոլիկ քահանա, 18-րդ դարի աստվածաբան Իգնազ Ֆրանցը (Ignaz Franz), ի լրումն սրա՝ «Für mich soll’s rote Rosen» («Ինձ համար կարմիր վարդեր կտեղան») կոմպոզիցիան՝ լեգենդար գերմանացի դերասանուհի և երգչուհի Հիլդեգարդ Քնեֆի և 1970-ականների հիթ «Du hast den Farbfilm vergessen» («Դու մոռացել ես գունավոր ֆիլմը»), որը ժամանակին փառաբանվել է գերմանական փանկ ռոքի մայր Նինա Հագենի կողմից։ Ահա այսպիսին է եղել անսպասելի երաժշտական կոկտեյլը։

Տաթև Ֆռանգյան