31.12.2025 | 22:00
Starlink ծառայությունների պաշտոնական մեկնարկը Հայաստանում՝ անցնող տարվա ձեռքբերում․ Մխիթար Հայրապետյան
«Խրախճանք ժանտախտի ժամանակ». երբ Ալեն Սիմոնյանի համար 200.000 դոլարանոց մեքենան պատերազմող երկրում առաջնահերթություն է․ ՏԵՍԱՆՅՈւԹ
Քաղաքականություն
25.11.2021 | 22:26
«Բոլորիս աչքի առաջ կառուցվում է չնաշխարհիկ պադավատապետություն»․ Նիկոլ Փաշինյանն այս կարծիքը հայտնել է ԱԺ-ում ունեցած մի բոցաշունչ ելույթի վերջում, որի ընթացքում զարմանքով՝ ի լուր Հայաստանի հայտնում է, որ Դանիայի խորհրդարանում կա ընդամենը մեկ ծառայողական ավտոմեքենա: Փաշինյանն այդ պահին, հավանաբար, չէր մտածում, որ տարիներ հետո Հայաստանի «պադավատապետությունը» համալրվելու է ևս մեկ գերթանկարժեք ավտոմեքենայով՝ իր իսկ կայացրած որոշմամբ:
Այսօր Կառավարությունը չզեկուցվող նախագծով՝ ժողովրդից գաղտնի, որոշեց ԱԺ նախագահ Ալեն Սիմոնյանի համար 200 հազար դոլարանոց BMW մակնիշի ծառայողական մեքենա գնել: Ուշագրավն այն է, որ ժողովրդավարության և թափանցիկ կառավարման մասին անհաշվելի հայտարարություններ արած Փաշինյանը հարկ չէր համարել զեկուցվող նախագծով ժողովրդին ներկայացնել շքեղ գնման մասին:
Բարձրագույն իշխանությունը՝ ժողովուրդը, լրատվամիջոցներից տեղեկացավ, որ իրենցից պողպատյա մանդատ ստացած Կառավարությունը Ալեն Սիմոնյանի համար ներկայացուցչական դասի BMW 750 մակնիշի ավտոմեքենա է գնում՝ հարկատուների հաշվից վճարելով 90 մլն դրամ:
Մինչ Հայաստանի աղքատ քաղաքացիները և քաղհասարակության ներկայացուցիչները կանգ չառնող գնաճի ֆոնին տարակուսած այս հարցադրումն են անում, Ալեն Սիմոնյանի ղեկավարած ԱԺ-ի հեղինակած որոշման նախագծում հրատապ կարգով թանկաժեք BMW-ի ձեռքբերման այսպիսի հիմնավորում ենք կարդում. «ԱԺ նախագահին սպասարկող մեքենայի ընթացիկ տեխնիկական սպասարկումը դարձել է ծախսատար և նրա շահագործման ու պահպանման համար ֆինանսական միջոցների հատկացումները այլևս արդյունավետ և նպատակահարմար չեն»:
Ալեն Սիմոնյանի նոր՝ 90 միլիոն դրամանոց մեքենան գնվելու է BMW-ի պաշտոնական ներկայացուցչի ավտոսրահից՝ «Եվրոմոթորս»-ից։ Այս ընկերությունը պատկանում է ԲՀԿ ղեկավար Գագիկ Ծառուկյանին:
Իրավապաշտպան Ժաննա Ալեքսանյանը հետպատերազմական իրավիճակում, երբ կան բազմաթիվ չլուծված խնդիրներ, անօթևան տեղահանվածներ, հորից ու որդուց զրկված ընտանիքներ, 200.000 դոլարանոց ծառայողական մեքենայի գնումն անբարոյականություն է համարում։
ԱԺ խոսնակի համար 200 դոլարանոց մեքենա գնելու ֆոնին հիշարժան են դառնում պատերազմից հետո մեկ տարվա ընթացքում իշխանությունների կողմից չլուծված խնդիրները: Մասնավորապես, թերի կահավորված մարտական դիրքերում հայրենիքի սահմանների պաշտպանությունն իրականացողները ստանում են ընդամենը 160 հազար դրամ աշխատավարձ: Խնդրի մասին դեռ ամսվա սկզբին հայտնել էր ԱԱԾ տնօրենի տեղակալը:
Շուրջ մեկ ամիս առաջ էլ Factor TV-ն անդրադարձել էր Պաշտպանության նախարարության կողմից շրջանառության մեջ դրված մի նախագծի, որտեղ հստակ նշված էր, որ կան չկահավորված մարտական դիրքեր:
Ալեն Սիմոնյանին այժմ սպասարկում է 2011 թվականին Հովիկ Աբրահամյանի օրոք գնված զրահապատ BMW ավտոմեքենան, ինչը, ի դեպ, ժամանակին շատ սուր քննադատում էր Նիկոլ Փաշինյանը:
Հեղափոխությունից հետո Փաշինյանն ու թիմակիցները փորձում էին ցույց տալ, որ ժողովրդից չեն հեռանում՝ կառավարական պաշտոններ զբաղեցնելուն զուգահեռ: Փաշինյանը, օրինակ, հեծանիվով էր աշխատանքի գալիս, Արայիկ Հարությունյանը՝ մետրոյով, Տիգրան Ավինյանն էլ ընդմիջում էր արագ սննդի կետերում:
Ի դեպ՝ նշենք, որ Հռոմի պապ Ֆրանցիսկոսը երթևեկում է միջին կարգի «Ռենոյով»:
Մանրամասները՝ տեսանյութում։
Նարեկ Կիրակոսյան
