11.10.2026 | 14:16
Թրամփն առաջարկել է Ատլանտյան օվկիանոսը վերանվանել իր պատվին
«Թուրքիան գնալով ուժեղանում է»․ Էրդողանի կուսակցության պատգամավորները հերքում են, որ երկրում տնտեսական ճգնաժամ է
Քաղաքականություն
24.11.2021 | 23:41
Թուրքիայի նախագահ Ռեջեփ Թայիփ Էրդողանի իշխող «Արդարություն և զարգացում» կուսակցության պատգամավորների կարծիքով՝ երկրում տնտեսական ճգնաժամ չկա, գրում է Duvar-ը։
Մասնավորապես, պատգամավոր Ռամազան Ջանը հերքել է երկրում խորացող տնտեսական ճգնաժամի մասին պնդումները՝ նշելով, որ «Թուրքիան գնալով ուժեղանում է»։
«Որոշների համաձայն՝ Թուրքիան խորտակվում է։ Այո՛, Թուրքիան դառնում է ավելի ուժեղ և դա որոշներին անհանգստացնում է»,- գրել է Ջանը թվիթերյան իր էջում։
Մեկ այլ պատգամավոր՝ Ույգուր Այդեմիրը մի կողմից խոստովանել է, որ թուրքական տնտեսությունը ճգնաժամի մեջ է, սակայն հավելել է, որ անվտանգության առումով ոչ մի զիջում չի լինելու։
«Միգուցե մենք օրերով սոխ ու հաց ուտենք, սակայն մենք որևէ զիջման չենք գնա մեր անվտանգության հարցում։ Ես այստեղ ամբողջ աշխարհին եմ ասում»,- ասել է Այդեմիրը խորհրդարանում բյուջեի քննարկումների ժամանակ։
Պատգամավոր Զուլֆու Դեմիրբաղն էլ ավելի վաղ Թուրքիայի ժողովրդին առաջարկել են ավելի քիչ ուտել՝ տնտեսական ճգնաժամի ու պարենային ապրանքների գների աննախադեպ աճի պատճառով։
«Մենք կարող ենք երկու կիլոգրամ գնելու փոխարեն երկու լոլիկ գնել: Այնուամենայնիվ, ձմռանը բերք ուտելն այնքան էլ առողջարար չէ»,- ասել էր Դեմիրբաղը։
Հավելենք, որ նախօրեին թուրքական լիրան պատմական արժեզրկում էր գրանցել՝ մեկ դոլարի նկատմամբ հասնելով 13 դոլարի։ Երկրում համատարած թանկացումներ են, պարենային ապրանքների սահմանափակ քանակությամբ են վաճառվում։ Նախօրեին երկրի մի շարք քաղաքներում նաև բողոքի ցույցեր են անցկացվել Էրդողանի կառավարության հրաժարականի պահանջով։
Էմմա Չոբանյան
