01.11.2026 | 16:55
Մթնոլորտային օդում փոշու պարունակությունը՝ Վանաձորում և Ալավերդիում
Վաշինգտոնն աջակցում է Փաշինյանի ու Ալիևի շփումներին․ Բաքվում ԱՄՆ դեսպան
Քաղաքականություն
22.11.2021 | 17:45
ԱՄՆ-ն աջակցում է Ադրբեջանի և Հայաստանի միջև ուղիղ շփումներին, որոնք ուղղված են երկրների միջև հարաբերությունների կարգավորմանը։ Այս մասին հայտարարել է Ադրբեջանում ԱՄՆ դեսպան Լի Լիտցենբերգերը, գրում են տեղական լրատվամիջոցները։
«Ինձ հաճելի էր տեսնել այդ հանդիպման մասին հայտարարությունը։ ԱՄՆ-ն քրտնաջան աշխատել է, որ առաջնորդները ուղիղ հանդիպեն։ Հուսով եմ, որ այդ հանդիպումը կդառնա քայլ առաջ՝ երկրների միջև նորմալ հարաբերությունների հաստատման համար»,- ասել է Լիտցենբերգերը՝ մեկնաբանելով դեկտեմբերի 15-ին Բրյուսելում «Արևելյան գործընկերության» գագաթնաժողովի շրջանակում ծրագրված ՀՀ վարչապետի ու Ադրբեջանի նախագահի հանդիպումը։
«Մենք ողջունում ենք այդ կամքը և հույս ունենք, որ կողմերը դա կօգտագործեն»,- ասել է դեսպանը՝ նշելով, որ ԱՄՆ-ն հավատարիմ է տարածաշրջանում կայուն խաղաղության հաստատման դիրքորոշմանը։
Ըստ դիվանագետի՝ ԱՄՆ-ը և Ռուսաստանն ունեն լավ համագործակցություն միայն մեկ հարթակում՝ դա ԵԱՀԿ Մինսկի խումբն է։
«Վերջերս այս ձևաչափի շրջանակում մենք կազմակերպեցինք Հայաստանի և Ադրբեջանի ԱԳ նախարարների երկու հանդիպում։ Մենք կհամագործակցենք այստեղ, այս ձևաչափն արդյունավետ է։ Բնականաբար, մենք աջակցում ենք նաև այլ ձևաչափերի, որոնք ենթադրում են այդ երկրների ղեկավարների ու պաշտոնյաների հանդիպումներ»,- ասել է ԱՄՆ դեսպանը։
Նա նաև նշել է, որ Բայդենի վարչակազմը հետաքրքրված է Հարավային Կովկասով ու Ադրբեջանով՝ հավելելով, որ ԱՄՆ-ը ցանկանում է աջակցել Հայաստանի ու Ադրբեջանի միջև հարաբերությունների վերականգնման գործընթացին։
Էմմա Չոբանյան
