Դավիթ Հարությունյանը գոհ է, որ պատմության մեջ կմնա որպես մամուլի առջև դռները փակող նախարար. ՏԵՍԱՆՅՈՒԹ

«Որևէ քայլ որ կատարում եմ, գիտակցում եմ, որ քննադատության կարժանանամ, այնուհանդերձ փորձում եմ անել այն, ինչն ավելի կօգնի, որ քննարկումները լինեն ավելի խորը, ավելի բովանդակալից և արդյունքում ավելի որակյալ որոշումներ ընունվեն։ Այնպես որ՝ այո, ես գոհ եմ իմ արածից»,- Կառավարության նիստից հետո լրագրողների հետ ճեպազրույցում ասաց Արդարադատության նախարար Դավիթ Հարությունյանը՝ պատասխանելով լրագրողի հարցին, թե արդյոք գոհ է կառավարության նիստերը դռնփակ դարձնելու իր նախաձեռնած փոփոխությունից և նրանից, որ պատմության մեջ կմնա որպես մամուլի առջև դռները փակող նախարար։

Ինչ վերաբերում է կառավարության նիստերի՝ դռնփակ դառնալուց հետո լրագրողների աշխատակարգին, Դավիթ Հարությունյանը հավաստիացրեց, որ ճեպազրույցների ավանդույթը, որոնց ընթացքում գերատեսչությունների ղեկավարները պատասխանելու են լրագրողների հարցերին, կդառնա ավելի կանոնակարգված։ «Մենք ավելի պատասխանատու մոտեցում կստանձնենք, որպեսզի նվազագույնի հասցնենք վերջին պահին օրակարգի համալրումները, իսկ նախարարները ամենատարբեր հարցերով, մենք որոշում կկայացնենք, թե որ հարցերն են հանրային հետաքրքրություն ներկայացնում, այստեղ կպատասխանեն ձեր հարցերին»,- հավաստիացրեց Հարությունյանը։

Նա բացառեց, որ լրագրողների մուտքը լինի ինչ-որ պաշտոնյայի քմահաճույթով: «Ես կարծում եմ յուրաքանչյուր նիստում կլինեն հանրային կարևորություն ունեցող հարցեր և դրանց վերաբերյալ բրիֆինգ կլինի այստեղ»,- եզրափակեց Արդարադատության նախարարը։