17.07.2026 | 09:48
Նավթի գներն աճել են
Գագիկ Ծառուկյանը դատարանում հաղթել է ՊԵԿ-ին
Հասարակություն
18.11.2021 | 22:16
Խոշոր գործարար, «Բարգավաճ Հայաստան» կուսակցության ղեկավար Գագիկ Ծառուկյանին պատկանող «Օնիրա քլաբ» ՍՊԸ-ի հայցն ընդդեմ ՊԵԿ-ի դատարանում բավարարվել է: Արդյունքում Ծառուկյանին պատկանող ընկերությանը չի վճարի ՊԵԿ-ի կողմից արձանագրված 6 միլիարդ դրամի խախտումը:
Նշենք, որ «Օնիրա քլաբ» ՍՊԸ-ն շահագործում է Աբովյան քաղաքի ճանապարհին գործող «Շանգրի լա» խաղատունը: Այս մասին տեղեկանում ենք «Դատալեքս» տեղեկատվական հարթակից։
Կորոնավիրուսի համավարակի հետևանքով ստեղծված սահմանափակումների պատճառով Ծառուկյանին պատկանող խաղատունը դադարեցրել էր գործունեությունը և չէր վճարել Հայաստանում խաղատների գործունեության կազմակերպման համար նախատեսված պետական տուրքը: ՊԵԿ-ը «Շանգրի լա»-ին տուգանել էր պետտուրքը չվճարելու համար, իսկ վերջինս էլ վարչական դատարանում բողոքարկել էր պետական գերատեսչության կիրառած սանկցիան:
Հիշեցնենք, որ այս խաղատան գործունեության հետ կապված՝ ԱԱԾ-ն քրգործ է հարուցել 2020 թվականին: ԱԱԾ-ի հաղորդագրությունից տեղեկանում ենք, որ «Օնիրա քլաբ» ՍՊԸ-ն առանց հատուկ լիցենզիայի ապօրինի խաղատուն է շահագործել «Շանգրի լա»-ի տարածքում, ինչի արդյունքում, ըստ ԱԱԾ-ի, պետությանը պատճառել է մոտ 30 միլիարդ դրամի վնաս։ Մեկ տարուց ավելի ժամանակ է անցել, բայց ԱԱԾ-ն այլ նորություն չի հայտնել:
Նկատենք՝ դատարանը Ծառուկյանի ընկերության հայցը բավարարել է սեպտեմբերի 22-ին: Այս որոշման կայացումից հինգ օր առաջ Գագիկ Ծառուկյանը Factor TV-ի լրագրողի հարցին ի պատասխան՝ տեղեկացրել էր, որ եթե ընդդիմությունը Փաշինյանի հրաժարականը պահանջի, ապա ԲՀԿ-ն այդ գործընթացին չի միանա:
