ՔՊ-ից Վիլեն Գաբրիելյանը Ղազինյանի թեկնածության առաջադրումը կանխող նախագիծ է շրջանառում

Իշխող «Քաղաքացիական պայմանագիր» խմբակցության պատգամավոր Վիլեն Գաբրիելյանը «Ազգային ժողովի կանոնակարգ» սահմանադրական օրենքում փոփոխություններ կատարելու մասին նախագիծ է դրել շրջանառության մեջ։ Պատգամավորն առաջարկում է օրենքը լրացնել նոր հոդվածով, այն է. «Եթե ԱԺ մշտական հանձնաժողովի նախագահի տեղակալը չի ընտրվում, ապա իրավասու խմբակցությունը քվեարկությունից հետո՝ հինգ աշխատանքային օրվա ընթացքում առաջադրում է նոր թեկնածու։ Եթե օրենքը կարգավորում է հանձնաժողովի նախագահի ընտրության կարգը, ապա փոխնախագահի պարագայում օրենքում բաց կա:

Գործող կարգավորմամբ մշտական հանձնաժողովի նախագահ չընտրվելու դեպքում իրավասու խմբակցությունը քվեարկությունից հետո՝ տասնօրյա ժամկետում, թափուր մնացած պաշտոնի համար առաջադրում է նոր թեկնածու, սակայն օրենքով չունենք կարգավորում, որում հստակ կարգավորվում է մշտական հանձնաժողովի նախագահի տեղակալի ընտրության կարգը:

Հիշեցնենք, որ 8-րդ գումարման Ազգային ժողովի պաշտպանության և անվտանգության հարցերի մշտական հանձնաժողովը մինչև այժմ չի կարողացել ընտրել հանձնաժողովի նախագահի տեղակալ: «Հայաստան» խմբակցությունն անընդհատ առաջադրում է նույն թեկնածուին՝ պատգամավոր Արթուր Ղազինյանին, որին հանձնաժողովի անդամների ՔՊ-ական մեծամասնությունը չի ընտրում: Ղազինյանն արդեն 12 անգամ չի ընտրվել փոխնախագահի պաշտոնում։

Նախագծի հեղինակը հույս ունի, որ նախագծի ընդունման արդյունքում ԱԺ պաշտպանության և անվտանգության հարցերի մշտական հանձնաժողովի աշխատանքը բնականոն ընթացք կունենա:

Մերի Մարտիրոսյան