ԵՄ-ն կորոնավիրուսի նոր ալիքից պաշտպանվում է պատվաստման անձնագրերով

Կորոնավիրուսով հիվանդացության կտրուկ աճի ֆոնին ավելի ու ավելի շատ եվրոպական երկրներ են նոր սահմանափակումներ մտցնում և պատվաստումների անձնագրերը դարձնում նախապայման՝ ինչպես հանրային վայրեր մուտք գործելու, այնպես էլ միջոցառումների մասնակցելու համար, գրում է BBC-ի ռուսական ծառայությունը։

ԱՄՆ Ջոնս Հոփքինսի համալսարանի տվյալներով՝ կորոնավիրուսով վարակվածների ընդհանուր թիվն այժմ կազմում է գրեթե 255 միլիոն մարդ, ավելի քան 5,1 միլիոն հիվանդ մահացել է։ Միևնույն ժամանակ, աշխարհում արդեն կատարվել է ավելի քան 7,5 միլիարդ պատվաստում կորոնավիրուսի դեմ (ամբողջական պատվաստման համար ամենից հաճախ պահանջվում է երկու չափաբաժին, սակայն որոշ մարդիկ արդեն երեք անգամ են պատվաստվել):

Հիվանդության տարածման առումով առաջատարը մնում է Միացյալ Նահանգները. վերջին 28 օրվա ընթացքում այնտեղ գրանցվել է ավելի քան 2,1 միլիոն նոր ախտորոշում, երկրորդ տեղում Միացյալ Թագավորությունն է (1,1 միլիոն դեպք), իսկ Ռուսաստանը՝ երրորդում (ավելի քան 1 միլիոն դեպք): Ռուսաստանում վերջին մեկ օրվա ընթացքում կրկին գրանցվել է կորոնավիրուսից մահացածների առավելագույն թիվը համաճարակի ամբողջ ընթացքում։

Այնուամենայնիվ, եթե նախկինում կորոնավիրուսն առավել ակտիվորեն տարածվում էր Արևելյան Եվրոպայում, ինչպիսիք են Ռուսաստանը, Ուկրաինան և Ռումինիան, ապա այժմ վարակման դեպքերի նոր ալիք է տարածվում մայրցամաքի արևմտյան հատվածում։

Գերմանիայի կանցլեր Անգելա Մերկելը զգուշացրել է, որ իրավիճակը երկրում կարող է դրամատիկ դառնալ։ Չորեքշաբթի այստեղ նոր դեպքերի օրական թիվը կազմել է 52,8 հազար՝ ամենաբարձր ցուցանիշը ողջ համաճարակի ընթացքում։ Գերմանիայի Դաշնային Հանրապետության ղեկավարները պատրաստվում են համաձայնեցնել կարանտինային նոր միջոցառումները։ Reuters-ի փոխանցմամբ՝ իշխանությունները կարող են արգելել հասարակական տրանսպորտից օգտվել նրանց, որոնք չունեն պատվաստման վկայական կամ բացասական թեստ:

Հարևան Ավստրիայի կողմից արդեն հայտարարվել է կոշտ լոքդաուն մոտ 2 միլիոն չպատվաստված բնակիչների համար:

Բելգիայի վարչապետ Ալեքսանդր Դե Կրոուն հայտարարել է, որ «Եվրոպայի քարտեզն արագորեն կարմրում է, ինչպես և մենք»։ Այս երկիրը դեռ լիարժեք կարանտին չի սահմանել, բայց զգալի սահմանափակող միջոցներ է ձեռնարկում. երեխաները ստիպված կլինեն դիմակ կրել 10 տարեկանից (ոչ թե 12 տարեկանից, ինչպես մինչ այժմ էր), շաբաթական չորս օր բնակիչները կաշխատեն տանից, թանգարաններ, կինոթատրոններ մուտք գործելու համար կպահանջվեն COVID-անձնագրեր։

Նիդերլանդներում արդեն գործում է մասնակի արգելափակում, իսկ Շվեդիան, որտեղ մինչև վերջերս Եվրոպայում ամենամեղմ կորոնավիրուսային վերահսկման ռեժիմն էր գործում, առաջին անգամ ներմուծում է պատվաստման անձնագրի պարտադիր ներկայացման համակարգը փակ վայրերում՝ համերգների և այլ հանրային միջոցառումների մասնակցելու համար։

Չեխիայի իշխանությունները հայտարարել են, որ չպատվաստվածները կամ նրանք, որոնք չեն կարող ցույց տալ վերջին հիվանդության վկայականը, չեն կարողանա մասնակցել հանրային միջոցառումներին։

Վարակման դեպքերի թիվն աճում է նաև Ֆրանսիայում, որտեղ արդեն գործում են կորոնավիրուսային անձնագրերը։ Չորեքշաբթի, օգոստոսից ի վեր առաջին անգամ, այստեղ գրանցվել է ավելի քան 20 հազար դեպք, սակայն իշխանությունները դեռ մտադիր չեն ավելացնել սահմանափակումները, քանի որ գործող համակարգը հաջողությամբ է գործում։

Տաթև Ֆռանգյան