25.04.2026 | 10:49
Լարս ավտոճանապարհը փակ է
Էրդողանը հայտարարել է, որ ընտրություններում իր պարտության դեպքում Թուրքիան ներքաշվելու է քաոսի մեջ
Քաղաքականություն
18.11.2021 | 15:47
Եթե ընդդիմությունը հաղթի հաջորդ ընտրություններում, Թուրքիան կներքաշվի քաոսի մեջ։ Այս մասին հայտարարել է Թուրքիայի նախագահ, իշխող «Արդարություն և զարգացում» կուսակցության ղեկավար Ռեջեփ Թայիփ Էրդողանը, գրում է Bianet-ը։
Ելույթ ունենալով իր կուսակցության խորհրդարանական խմբակցության նիստում՝ Էրդողանն ասել է, որ գլխավոր ընդդիմադիր Ժողովրդահանրապետական կուսակցությունը (CHP) «երկրի համար վտանգավոր խաղ է խաղում»։
Թուրքիայում հաջորդ նախագահական և խորհրդարանական ընտրություններն անցկացվելու են 2023 թվականին։ Իշխող ուժը պարբերաբար մերժում է արտահերթ ընտրություններ անցկացնելու՝ ընդդիմության պահանջը, քանի որ, ըստ վերջին հարցումների, Էրդողանի և իր կուսակցության վարկանիշը գնալով նվազում է։
«Նրանք իրենց հետ տանում են, այսպես կոչված, ազգայնական կուսակցությունը և կուսակցություն, որը վերահսկվում է անջատողական կազմակերպության կողմից»,-ասել է Էրդողանը՝ նկատի ունենալով «Լավ» կուսակցությունը, որը CHP-ի դաշնակիցն է, և քրդական Ժողովուրդների դեմոկրատական կուսակցությունը, որին նա մեղադրում է Քուրդիստանի աշխատավորական կուսակցության հետ կապերի մեջ։
«Նրանք, ովքեր առաջնորդում են CHP-ին, խաղ են խաղում, որը թվում է՝ շահավետ է նրանց, սակայն վնասակար է մեր պետության համար։ Եթե նրանք հաղթեն, Թուրքիան կներքաշվի քաոսի մեջ՝ անորոշ ավարտով։ Դա մենք չենք ասում, պատմությունն է ցույց տալիս»,- հայտարարել է Էրդողանը։
Նա նաև նշել է, որ ժողովուրդը շատ լավ տեղյակ է՝ ինչ է կատարվում։
«Երբ մեր ազգը 2023 թվականի հունիսին գնա ընտրատեղամասեր, նրանք կնայեն մեր գործերին ու այս մութ ուժերին։ Նման պատկերի առաջ բոլորը կդիմեն ԱԶԿ-ին և Ժողովրդական դաշինքին»,- ասել է Թուրքիայի նախագահը։
Էմմա Չոբանյան
