08.06.2026 | 21:45
Ջրվեժի գերեզմանատան մոտ մեքենա է այրվել
ԵՄ-ն Հայաստանին և Ադրբեջանին կոչ է անում առավելագույն զսպվածություն դրսևորել, հետ քաշել ԶՈՒ ստորաբաժանումները
Քաղաքականություն
17.11.2021 | 19:26
ԵՄ արտաքին գործերի ու անվտանգության քաղաքականության հարցերով հանձնակատարի խոսնակը հայտարարություն է տարածել Ադրբեջանի կողմից ՀՀ-ի նկատմամբ իրականացված ագրեսիայի կապակցությամբ։
«ԵՄ-ն խորապես մտահոգված է հայ-ադրբեջանական սահմանի երկայնքով վերջին բռնությունների կապակցությամբ, որոնք, ցավոք, հանգեցրել են մարդկային կորուստների։ Եվրոպական խորհրդի նախագահ Շառլ Միշելն իրավիճակը հեռախոսազրույցներում քննարկել է Ադրբեջանի նախագահ Իլհամ Ալիևի և ՀՀ վարչապետ Նիկոլ Փաշինյանի հետ՝ կոչ անելով անհապաղ դադարեցնել էսկալացիան և հարգել հրադադարը։
ԵՄ-ն Հայաստանին և Ադրբեջանին կոչ է անում առավելագույն զսպվածություն դրսևորել, հետ քաշել ԶՈՒ ստորաբաժանումները և հարգել երկու եռակողմ համաձայնությունների շրջանակում ստանձնած պարտավորությունները։
Կոչ ենք անում երկու կողմերին վերսկսել բանակցությունները՝ աշխատելու չլուծված խնդիրների համապարփակ կարգավորման ուղղությամբ, ներառյալ՝ սահմանների դեմարկացիայի։
ԵՄ-ն աջակցում է Մինսկի խմբի համանախագահների նոյեմբերի 15-ի հայտարարությանը։ ԵՄ-ն վերահաստատում է Հայաստանի և Ադրբեջանի հետ աշխատելու իր հանձնառությունը՝ օգնելու հաղթահարել լարվածությունը և նպաստել Հարավային Կովկասի կառուցմանը, որն ապահով, կայուն, բարգավաճ և խաղաղ կլինի՝ ի շահ տարածաշրջանում ապրող բոլոր մարդկանց»,- ասվում է հայտարարության մեջ։
Էմմա Չոբանյան
