19.11.2024 | 18:23
Պարոն Իսկանդարյան, «калькулятор»-ը հանեք, հաշվենք․ Ավինյանը տրանսպորտի վճարների մուտքերն է հաշվում․ ՏԵՍԱՆՅՈՒԹ
Զոհված Մերուժան Հարությունյանը երկու անչափահաս երեխա ունի․ երկու եղբայր միասին են կռվել
Հասարակություն
17.11.2021 | 18:11
Նոյեմբերի 16-ին մարտական գործողությունների ընթացքում զոհված 30-ամյա պայմանագրային զինծառայող, շարքային Մերուժան Հարությունյանը Գյումրիից էր, 44-օրյա պատերազմի մասնակից։ Պատերազմի առաջին իսկ օրից առաջնագծում է եղել, վիրավորվել, բայց շարունակել կռվել։ Հորաքրոջ տղան՝ Խաչիկ Մարտիրոսյանը, Factor.am-ին պատմեց, որ Մերուժանի եղբայրը ևս պայմանագրային զինծառայող է։ Միասին էին ծառայում, երեկ նույնպես միասին են կռվել։ «Այդ պահին Մերուժանի կողքին է եղել։ Սյունիքում են եղել՝ Սև Լճի տարածքում»,- նշեց Մերուժանի հորաքրոջ տղան։
Մերուժանը պայմանագրային զինծառայող էր արդեն 4 տարի։ Հորաքրոջ տղայի խոսքով՝ սիրում էր զինվորականի գործը, իրենց գերդաստանում շատերն են այդ գործին նվիրված։
Մերուժանն ընտանիքի հետ Երևանում էր բնակվում։ Երկու անչափահաս երեխա ունի՝ 12 տարեկան աղջիկ ու 2 տարեկան տղա։
«Շատ հայրենասեր էր Մերուժանը դրա համար էլ կյանքը տվեց հանուն հայրենիքի»,- ընդգծեց Խաչիկը։
Հիշեցնենք, որ պաշտպանության նախարարությունը մինչ այս պահը հայտնել է երեկվա ռազմական գործողությունների հետևանքով միայն մեկ զոհի ու 13 գերեվարված զինծառայողի մասին։ Գործողությունների ընթացքում կորել է կապը 24 զինվորի հետ․ նրանց ճակատագիրն այս պահին անհայտ է։
Արփի Հակոբյան
